Min tiam chiang alawm

Thu hma

Tunlai khawvelah  thutiam mai hi kan awlsam ang reng khawp mai. Kan nitin nun hi han chhui let ta ila- kan awm mai mai emaw kan tih lai pawh hian keimahah emaw mi lakah emaw thu tiam kan lo siam leh reng tawh thin. Kan nu leh pate pawh hian kan lakah hian eng eng emaw thutiam chu an nei ve thin. Kan nghak hlel viau thin a ni.

Sawi duh zawk ka nei

Mahse he thutiamah hian a tiamtu pawimawhna ni lovin a thutiam dawngtu  pawimawhna hi ka ziak chak tlat mai thin a. Kan ute an ni emaw chhungte an ni emaw  an thutiam kha kan ngaih bo pui avangin kan chan tur kha kan hlauh phah fo thin. Anmahni phei chuan an manghilh hma ang reng bawk si a. Chutah tak chuan keimahni hian kan bawhzui a tul thin a ni.

Ramhruaitute intiam hi

Hei hi thil pawimawh ve tak chu a ni. Kan hnam a nuapan luat tuk avang hian mi khirh tak pawh hi  a huho ang zawng chuan a lo ngaihsam ve viau mai zel bawk a. Kan hruaitute hi keimahni rawngbawl turin an inpe a. An rawngbawl dan tur chu chiang takin kan thlan dawnah min hrilh hre thin. Hma kan sawna kan nun khua a lo nawm ve theihna nan hmachhawp tangkai tur tak tak kan tan an insiam chawp thin. Mahse tihhlawhtlin leh tak loh hi ava tam tak em! Tunhnaiah mai pawh Congress sorkar hian Vigilance Commission din tuma min tiamna kha an ti hlawhtling dawn miah lo tih an puangzar ta. CBI koh luh theih avang te leh ACB tih len a nihte chhuanlamah an hmang a. PRISM tih loh chuan din tura nawrna thu uachhuahpui an awm meuh lo. Chutih lai erawh chuan  SP Singh-a, Hmeichhe puan ven, NIT, ldt., erawh kan chai nasa hle thung. Kan rilru puthmang hi thlak deuh ava tha em! Ngaihsam bansan hi a hun tawhin ka hria.

Anmahni hian an umzui ve thin ang em le?

Ka sawi tur  a awm teuh. Hman kum inthlan lai khan kan Prime Minister zahawm tak khan NLUP sum tur chu Prime Minister Special Package ang zawngin kan lo sik chhuak ang a ti a ni awm a. Mahse tunah chuan hei a ni ta awkawng lo mai! Enge a chhan ni ang le? Kan pute PM intiamna hi an bawhzui tha lo em ni le? A intiam tawh a, an umzui phawt chuan an hlawhtlin ka ring a ni. Mahse CM leh Minister taima vak lo ho hian an bawhzui tha tawk lo a nih ka ring. A chhan chu- khuallian leh engemaw thiltihnaah an kal tam em mai!

Plan sum atangin NLUP sum chu lakchhuah a ni dawn ta. Tun kum hi kum dang ang lo takin NLUP leh 6th Pay avangin kan state pachhe tak mai hian kan sum mamawhna a sang viau mai a. Mahse kan plan sum punna hi 13.33% chauh a ni. Prime Minister Special Package a awm tak loh avangin NLUP hian cheng 234 crores vel Plan sum atang hian la heu dawn a, chuan kan plan sum hi vaibelchhe 34 velin nikum aiin a tlem  dawn a ni. Chumi awmzia chu NLUP kan chhut tel hian kan plan sum hi a pung miah lo a nih hmel!

Hei pawh hi enge chhan ni ang? Engah nge a pun tlem viau le? A chhanna niawma ka tinzawn ve tak ber chu- Nikmuma mipui sum cheng vaibelchhe 72 zet thawnkir(lapse) vang kha a nih hmel. Khangte pawh kha a chhan niawma lang kan chhui chhuak ang tiin kan CM khan houseah a intiamin ka hria a; mahse mipui paw'n kan manghilh leh tawh aniang! Nakinah chuan Treasury pawh hi an khar leh lovang tih tunge sawi thei?

Ka sawi tumah  lut tawh ila 
Tun kum April ni 30  khan zankhat riakin kan Union Agriculture Pu Shard Pawar a lo zin a. Khatah khan thu min tiam chiang alawm. A sawi dan chuan Chamdur leh Phura chu buh tharchhuahna hmunpuiah kan siam ang a ti a nih kha. India ram pumpuia Agriculture huanga thuberin hetiang anga thu min tiam hi a lawmawm khawp mai. Amah ngeiin mithiam endika zirchiang turin a lo tirh tur thu a sawi bawk a. Lawmawm tak a ni! Khawvel ram zauvah hian he thu tluka thu lawmawm hi Zofate tan hian a awm tam lo viau ang le.

Mahse tunah hian eng ang zawngin nge hmalak a nih ka hre ta hauh lo mai. Ka theih dan ang angin ka beng kan chhi kual vel thin a. Bawhzuina lam ka la hre lo tlat. Assembly session ropui tak mai pawh a tiak ta. Mahse Union Ministerin a thu min tiam chungchang hi sawi rik a nih ka hre lo tlat mai. An lo sawi a nih chuan a lawmawm hle ang. Tumkhat kha chu Rambuai lai chanchin kha nihkhat teh ngawt mai an sawi chiang mai a. 'Thangtharte hnenah rambuai dan sawi tam tur' tih lam kha an thu kalpui dan a ni maiin ka hria. A tha vek e. Mahse Pu Sharad Pawara min tiamna lam hi House zahawm takah khan sawi rik a nih loh chuan mak ka ti ta ve ngawt ang!

Ngaihpawimawh tur a va ni em!

Ka sawi tawh angin India ram pumpuia Agriculture minister meuhin thutiam kan lakah a siam a ni. Kan bawhzui that chuan min tihduhsak ngei ngei ang. Mahse  ‘a van tla’ kan nghak a nih chuan a thutiam kha a hlawhtling lo thei a ni. Nakin lawkah ‘Tih sak min tiam chiang alawm’ tia kan indawmkun mai loh nan kan hotute hian han bawhzui se ka va ti em! Ziakmite paw’n ngaihven deuh chu a ngai a ni.