Campus ka chhuahsan leh lawk dawn

Thuhma

Hun leh nite hi an lo ral chak khawp mai. Kan awm mai mai emaw kan tih lai hian Pathian hruaina avangin kan hun engemawzat chu kan lo hmang ral leh tawh mai thin. Kan fel leh that avanga nungdam kan nih loh zia ngaihtuah hian lawmna tur a tam thin e. Hmangaih Pathian A nihna hian kan chunga thatna chu Ni angin a entir zel a ni.

Nikum Winter chawlh result

Nikum Decmeber thlaa ka zu puih Baptist Comprehensive School, Putlungasih chuan HSLC pass nei thei mang lo thin kha 100% pass percentage an nei ve ta tlat mai. Principal inpekna zar liau liau a ni a. A lawmawm ka ti takzet a ni. Pathian ropui ber se!

Putlungasihah bawk chuan  

Result neih that chhan kha keimah vang emaw an ti deuh tlat pek a. Kal leh turin min duh deuh tlat mai a. Hei ka inhawlchhuak leh dawn a ni. A challenging thei khawp mai. Rawngbawlna tha min siamtu an Principal S Lalramengi chungah ka lawm a. A thawhrimna leh tumruhna – Mission Education lama a tanzia fakawm ka ti em em thin.

Puan tel meuha rawngbawla ka chhuah hian malsawm ka ni thin!

College ka kal lai pawh khan hetianga chhuti laia chhuah hi ka ti thin a. Puan tel meuha – thildang tamtak chan chunga A rawng ka bawl hian ka zirnaah ka ti tha em em thin tlat mai a nih chu mawle.

Tun kumah pawh hian nikum Decmeber thlaa ka rawngbawlna vang ni ngei tur a nit un Semester-a ka course work neih chu ka zo tha khawp mai. Tun semester-ah rau rau chuan ka SPI(mark hmuh) a sang ber a ni. Thiante mak tih khawpin ka ti tha a mahse Pathian vang a nih zia bak sawi tur ka nei lo thung!

Hun tha tak lo hmang ang che

Pathian hian chhan nei lovin ka chungah hian engmah thlen tir a nei lo. Awmze nei tak leh ruahmanna fel tak siamin min hruai thin a lo ni.

THE SKY

The lonely clouds!

Through the darkness there came a light
Under the sky - though so far but yet so bright
I closed my eyes and look deep insight
Walk this darkness without a fright
Cozz... I found a new life - so wonderful !
I hold his image like a precious sight
The one that sets my heart alight
So far I've come, its worth those years.
My strength  has now briskly grown
I no longer fear I travel alone;
I look beyond and see him there
I've found the light under the sky and I smile
I've been told there's a new sense of happiness
I've been told that my life has changed suddenly
In a way that its easily noticed when I pass by...
They don't know the Sky is secret behind my happiness.
I hear a sweet voice in my head
That says my path is clear ahead
This feelings of love that we share -
I had a freedom, I made this choice...
I would trade everything just to be with him
To me, he is just like the Sky
Always around me, so wonderful and bright;
So far away but yet so close to my heart..

(This is the poem composed by someone who is to be the one with all the integrity for me)

Rev Dr HS Luaia’n Rihsang Min Lo Kaisan A Lawm Le!

Thuhma

April ni 7, 2012 khan Isua Krista thawhlehna hmaruaitu a nihna champhaphak hun lawmawm tak nghakin rei tak ka meng a. Thil tih lai ka neih bawk avangin a tuk (8^th April) zing dar 4 thleng ka meng ta a. Easter chibai bukna message ka dawng pheuh pheuh a. Dar 4:12 am ah chuan message danglam tak ka dawng hlauh mai. Chuta inziak chu ‘ Rev Dr HS Luaia chuan min peih loh san ta’ tih hi a ni mauh mai.

Helai hmuna ka awm lai hian ka pu ka sun tawh a, Pu Luaia thih thu min lo hrilh leh ka pu thih thu min lo hrilh laia ka rilru nat dan hi a in ang rengin ka hre hial a ni. A lei kohhran enkawlna a thawhhlawk em em  leh Mizo society kan hmasawn theih nana mi rawntlak – lehkhabu kal thei miin an rawn luai luai thin Pu Luaia hriat reng nan hian he thuziak hi ka lo dah ve leh hram e.

Kum 21 mi a nihin Kohhran Upa a ni

Date 5.11.1908 khan Tawipui-ah a piang a. Amah hi Hrahsel Saza hnam a ni. Kum 11 mi a nihin Pastor Haudala’n Lungranga-ah baptisma a chantir. Kum 1920-ah  khan Serkawnah primary a pass a, 1923-ah Upper Primary a pass leh a, 1925-ah Sêrkâwn-ah Middle English a pass leh a. Kum 1928 chho khan  Darzo lamah zirtirtu hna a thawk leh a. Darzo-a a awm lai hian Thlarau Thianghlim harhna a chang ta a , kum 1929-ah a tlangvâl laiin Kohhran Upa-ah thlan a lo ni ta a ni.

Van lam kohna a chhang

Zirtirtu hna chu taima tak leh rintlak takin kum 9 chhung Khuanghlumah leh Darzo-ah a thawk hman a. Fa 2 neih hnu kum 1936 khan chunglam kohna duhawm tak a hre ta a. Serkawn lamah Pu Buanga phalna a la a. Mission chawmin Cherra Theological College lamah Pathian thu a zu zir ta a. Kum1938 khan diploma chu first division-ah a pass a.  A kum vek-ah  tirhkoh-in a thawk a. Kum  1939-ah Pastor Challiana’n  minister atan a nemnghet ta a ni.

Hruaitu nih thiam Thlarau mi bawk si

India ramin zalenna hmu dawn hnai anga thuthangte a awm tak chiam hnu-in Baptist Missionary Society, London chuan Baptist Church of  Mizoram inrelbawlna chu a rammite kuta hlan tha-in an hria a. Chumi avang chuan hotu lu ber Church Secretary post (tuna General Secretary ang hi) an siam ta a.  Kum 1946-a Haulawng Presbytery-ah lungrual takin Pastor Luaia chu Church Secretary atan thlan a ni ta a ni. Chuan church Secretary chu kum 25 (1946-1971) chhung a ni a. Chumi awmzia chu a zawnin hotu lu ber nihna hi vawi nga atan an thlang nawn hial tihna a nih chu.

Pastor dang ang lo takin Office-ah leh rorel ni khua-ah thluk fim tak a hmang thiam em em a. Pastor leh kohhran enkawlte kha tihdan a thiam thin em em thin. Chutih lai mek chuan mittui tla pur chunga nung taka Pathian thusawi lam a ti thei leh em em thung si thin a ni. He thil hi rawngbawltu leh pastor tamtakte tih theih ngai loh a ni.

Tin, ZBM Secretary a ni leh bawk a. Hemi mai bakah Pastor bial enkawlte, Hospital Chaplain nih thlengin a chelh chho vek a ni. A hun lai hian Kohhran inlak hran duhna te, politics tuinu te leh Prebyterian kohhran lam nena inhraithiamloh te kha a hun lai vekin a thleng a. Mahse thiam takin thu lai a sa a, a mawhphurna a hlen vek zel a ni.

A hun laiin harsatna a tawk nasa

Sawi tawh angin Church Secretary a nih tan kum hi Indopui tawp hun lam leh India ramin zalenna a hmuh tan tirh lai vel a ni a. Social leh economic lamah harsatna chi hrang hrang kohhran leh khawtlang lamin an tawk nasa hle. Chu a chhapah rambuai a lo ni leh a harsatna tamtak chinfel tur a nei. Kohhranin Peace Accord leh Citizen Committe a din a, chutah chuan Chairman a ni. Remna leh Muanna zawn chungchangah khan BCM leh Presbyteriante kha an  thawk ho a. Christian Peace Committee-ah khan Rev Zairema leh Rev. Lalngurauva Ralte te nen khan a pawimawh leh phusa pawlah an tang a nih kha.

Rambuai hun laia an hnathawh avang hian mihring nun tamtak chan tur kha kan chan loh phah a ni. A hlutzia hrethiam tan chuan lawmthu sawi mawlh mawlh na tur a ni. He an hnathawhna avang hian nekchep leh sawichhiat pawh an tuar nasa hle. Hruaitu lar leh ziaktu ni bawk- A. Thanglura phei chuan ‘Sazu mitdel pathum‘ tiin an hming a phuah sak hial a ni.

Kraws thu uar takin a sawi thin

A thusawi hi vawi tamtak ka ngaithla ve tawh a. Kraws chungchang hi sawi nuam a ti hle thin. Thupui dang deuh hlek hmanga thu a sawi chang pawh hian Kraws ang zawng hian a kual leh nge nge thin. Tum khat pawh – kum 2001 khan Biakkunga Murray vuinaa a thlamuanna thuchah sawi hi ka ngaithla pek a. Kha tah pawh khan Marthi tawngkam “Lalpa, heta awm ni la chu ka nuta a thi lo tur” tih ngei mai kha a chang thlan a. A sawi chho zel a. Kraws thiltihtheihna avanga thawhlehna hmahruaitu Isua kan neih thu lam a pe na leh ta ber a nih kha.

Tunhma chuan Baptist kohhran hian hlimsang leh hlimruite kha kan pawm thiam lo hle thin a. Hotute phei chuan an haw em em thin. Mahse ani hian a pawng ataka khatia han duhloh ngawt kha dik niin a hre lova. Church Secretary a nih hnu-in Baptist lam hian ama zarah an pawm thiam ve thei ta a. Harhna a thleng zing ve ta deuh a ni.

Mi tangkai a nihna hi mawle

Kohhran mai bakah social work lamah kuthnu a ngah hle a.  Kum 2000  February ni 12 khan  Senate of  Serampore  chuan  Doctor  of  Divinity (D.D) a hlan a. Kum 2002 khan India Sorkar atang-in Padma Shri chawimawina a  dawng  a. Heng  bakah hian  pawl  hrang  hrangin chawimawina engemawzat an pe bawk a ni.

Thuziak lamah pawh a thawhhlawk hle a. Lekhabu 10 chuang  leh  article  100  chuang  a  ziak  hial a ni. A boral hma kum 104 a nih lai mek pawh khan lehkhabu ziah lai a nei! Bible Society Lunglei  Branch President  hna  hi  kum 11 zet a thawk a, Bible lehlin hna kum 11 bawk a thawk tawh a ni. Mizo Upa Pawl president te a ni bawk a. Tin, Mizo Academy of Letters ah PATRON a ni a. Lok Adalat Member a ni bawk a, mi inkarah remna a awm theih nan a thawk nasa hle bawk.

Sawi tur a tam ka ui bang thei lo a ni e!

Faina lam hi a ngaipawimawh em em a. Serkawn khawlaia a kal mai mai emaw kan tih lai pawh hian a tiang hawl lai hian bawlhlawh a lo chhar leh nghek zel. Keima nghei pawh hian vawi tamtak ka hmu a ni.

A ngaihsanawm ka tih leh em em na chhan chu a pension tirh hian in leh lo nghet a nei miah lo. Pathian ram lama thawhlawm pek a uar lutuk avanga he thil hi thleng a ni. An chhungkua an rual em em a. Tu leh fa pawh a nei nual bawk. In leh lo nei lo, sum lama harsa tak chung khan Aizawl lamah Bible letling turin kum 11 chuang tirh a ni a. A hriselna pawn a tuar viau a ni. Amah tawngkam ngeia a sawi danin hetih lai hun vel hi a rilru hah zual lai niin a sawi thin. Upat lam a ni bawk a awm ka ti em em thin. Mahse “Pe rawh u tichuan pekin in awm ang” tih chu mihring ngaiha tlai hmel takah Pathian mite kaltlangin a dawng ta a. Pathian chungah a lawm em em a ni.

Duhtawk mai ang aw

A vuinaah thusawina hun min pe ve ta se sawi tur ka ngah ngawt ang le. He laia ka sawi lan loh a chhungte, serkawn mipui leh Baptist kohhran memberte hnena sawi tur ka va ngah tak em! Mahse ka duhtawk mai ang, a sei lutuk palh ang e. Kohhran chungchang chauh  ni lo – mizo society hmasawn theih nana mi rawntlak tak Rev Dr HS Luaia hi a uihawm tak tak a ni. Helai pawha kan sawi fo, kan inhnial luai luai thinna Zu chungchang pawh hi tun kum June thla velah a ngaihdan leh kohhran hmasate’n an lo khap tan dawn ka zawt ang ka tia. Mahse hei ka hawn hun chuan a lo awm tawh dawn ta huah lo mai. Tawih thei hian tawihtheihlohna sin turin rihsang min lo kaisan ta sia le!

Mi diktak ni bawk, hrezau bawk, thluak tha leh rorel thiam, taima si -  Pathian tih em em tu hi hun tha ka nei tan ve dawn chauha a lo liam mai ta hi ka ui em em a ni. Ka lo piangtlai deuh hlek hi a pawi a nih hi mawle! Tunlai huna kohhran leh khawtlang hi amah bawk hian kaihruai leh se ka tih chang a tam thin!

A chhungte leh Serkawn khawtlang ka tuarpui em em e!

Muang takin Pa hnenah chawl mawlh rawh se!

Mizoram lam thlalak

Eng eng emaw avangin Mizoram lam haw chanchin ka update thei tlat lo mai. A aiah thlalak thenkhat hi ka lo vawmbei mai mai teh ang:

He sikul hi ka han puih kha a ni. BCM Mission sikulah chuan upa berte zing ami a ni a; mahse class X result a that theih loh avangin recognized a la ni lo. Chutih rual chuan mission sikul adhoc aided ni thei pakhatna a ni. Principal thar a awm hnu hian a mual leh awmnate pawh laihzawl a ni a, hma a sawn nasa hle.

Putlungasih ka awm laia Lunar Eclipse chu....

Tun atanga kum 15ah chuan Bru(Tuikuk) communityah mi tangkai leh pawimawh ber ber an ni ang. December ni 6 atanga ni 24 thleng khan kan in awm a, vawikhatmah an ning hmel emaw peihlo hmel emaw ka hmu lo. Thiltha duh em em tute an ni. An felzia hi mi zinga sawichhuah tlak a ni!

December ni 25, 2011-a kan chhungkaw thlalak.

Dec 25 tho. Kan unauza-in. Kan farnu neih chhunin kum 2000 khan min boral san.

 

Mumbai lam pan leh dawna ka pa min tawngtaisak zo chiah lai. Ka nu leh pate hian an fate min hmangaih ang hian anmahni pawh an inhmangaih em em a ni. Ding lampanga lo lang ve hi Unhniara a ni. Hmana kan hnena lo inhlawhfa thin a nia, unau anga kan enkawl. Vawiin ni 2, February hian an nu- Unemi a sun. Ka lainat em em a ni!

December ni 26, krismas ruai-ni kha Zaikhawmna hun changtuah A kohhran hruaitute kal tlangin Pathian min ruat hlauh mai a, ka lawm hle. Thu tamtak ka sawi lova. Pathian hi kan hlim lai leh lawmlai- kan chak lai chiaha fak tur kan ni lo tih lampang ka sawi. Tin, 'Lallungawi kum hun lawmawm' tih lam pawh ka sawi bawk. Tun krismas khan hla pakhatmah hmaih lovin ka u(ka ding lama thu) nen khian kan lam chhuak parh. Pathian fak hi a lo nuam e! Kan khua tan Krismas zai nawm ber tum niin kan ngai deuh vek.

Engpawh nise duhtawk rih phawt ang. Hmuhnawm vak dawn bawk si lova.

MIZORAM LAM HAW CHANCHIN - 1

Mumbai kan chhuahsan

Kan chuanna tur rel kha darker 7 vel zeta an delay avangin 1^st Dec, 2011 zing dar 4 velah Mumbai kan chhuahsan thei ta chauh a. Ka thianpa leh Unau ni bawk KC-a nen kan sawt chho ta bauh bauh mai. Kan thiante 2, CST Terminal thlenga min thlahtu leh min ngaihven em em tute- Alberta leh Mawimawia chungah kan lawm hle.

Kolkatta lamah

Tluang takin tlai dar 2ah Howrah Station kan thleng a. Prepaid Taxi keiman ka book a, Salt Lake lam panin kan phei leh ta.

Kawng laklawhah Pathian thu ka sawi chhuak leh a. Ka thianpa KC-a a tui fal leh ta. Bible translation diklo tamtak a awm thu atangin a sawi tan leh a. Rinna chungchang a tih dang lam theih dante a sawi leh ta piap piap mai le. Ka ngawi reng a, a hun ka tihah ka “Aw” veleh mai zel a. King James Version eng vanga rintlak a ni nge? tihte leh Pastor tamtak email hmanga a contact thin thu thlengin min hrilh a. KC-a hi conservative tak mai a nia, a bula awm a hlawkthlak thin hle.

Mizoram houseah chuan mipa dorm-ah kan in nghat ve mai a. College kan kal laia kan lecturer Sir Gilbert-a a lo awm ve reng a, kan ti ti teuh.

Mizoram kan pan tak tak ta

A tuk dar 11 velah Mizoram lam pan turin Air Port kan pan ta a. Thlawhnaa luh hma busa kan chuan laiin Rev Rodinmawia leh a chhungte ka hmu hlauh mai. Thlate kan la a kan ti ti tan nghal a ni deuh mai. Thlawhna chhungah pawh ka hnungah chiah hian a thu a, BCM kal phung tamtak kan sawi dun a ni.

Lengpui kan thlen veleh kan chawl a, Mizoram chu nuam ka ti hle. Pitar leh Putar berh ve tak takte pawh kha ka hmu hmel tha ngei mai.

Dam takin thlen ka tum loh zawkna KC-ate inah dar 3:30 velah kan thleng a. Anu lo zin lai a ni bawk a, a nuam hle mai. An ni hi chhungkaw fel tak, entawn tlak em em an ni.

Kan inkhawm

Mizoram lama inkhawm hi kan chak hle a. Date ni 3, December (Inrinni) zan khan tihtakzetin BCM Bethlhem, Aizawlah kan va inkhawm ve ta. Tawngtai inkhawm a ni a. Mahni mizo pui bul ngei a inkhawm chu a nuam dangdai hle mai. Hla sak a nuam bawk si!

Thianpa(Unaupa ni bawk) KC-a hi Kohhran thlahthlam ngai miah lo a ni bawk a, Nilaini zan inkhawm thulh chu sawiloh Zing tawngtai inkhawm pawh kal kim vek thei a ni. Pathian thu pawh zir nuam a ti hle.

An kohhrana kan inkhawm pawh hian a lo hawng a ni tih an hriatin kohhran nu leh pate an lawm hle a, chibaitu pawh a ngah hle.

BCM Bawngkawn

A tuk zing dar 7(4^th Dec, 2011) ah chuan Aizawla ka awm chhunga ka lawina kohhran- Baptist Bawngkawnah inkhawm turin taxi ka la phei ta a. Aizawla ka awm phei tirh laia nau anga min enkawla min buaipui thintu Pu B Lalzarzovate inah tukthuan ka ei nghal bawk a. Amah hi kohhran leh Bial secretary hlun a ni hrim hrim bawk a. Kohhran leh Bial chanchinte min hrilh thuak thuak a. Tin, Bawngkawn Biak In an zawh fel dan a sawi phei chu ngaihnawm ka ti hle.

Inkhawmnaah

Bawngkawn kohhran hi ka inti neitu em em a. Biak In thar lo ding ta luah chuan ka rilru a khawih hle mai. KNP lamin crusade an lo nei mek bawk a. Tin, Kohhran nu leh pa thalaiin min lo lawm thiam hle. Kohhran Secretaryin thupuan pahin ka lo haw thute leh ding ngei tura min tithe kha lawmawm hle. Pathian ringtu leh chak lo chung chunga a hnung zuitu ka nih avang hian Pathian hian ka nihna ai bak bak hian mi zingah min chawimawi thin a, Amah chawimawi let ve hi ba nasa ka inti thin khawp mai.

Inkhawm banah Rbt Biakmunate inah thingpui kan in ho a. TKP inthlanna lama tel tura min tih avangin ka zu tel ve leh a. Mahse associate member chauh ka nih avang leh tunge hruaitu atan tha ang tih ka hriat mai theih loh avangin ka vote erawh ka pe ve ta lo.

Ka thawh thinna Sikul pakhat ka tlawh

Aizawla college ka kal lai khan sikulah ka inhlawhfa reng thin a. Ni khatah period hnih naupang ka zirtir thin. College lama ka attendance paw’n a tuar hle.

Ka thawh thinna pakhat Donbosco Hr. Sec. School-ah tlai dar 3 vel khan ka va leng a. Naupang an lo tam hle mai. Rev. Sang Soo Kim, Agapia Social Centre ami khan hun a lo hmang ve a. An ban hun nen kan in nang a, a hlimawm hle. Class XI lama ka student pahnih vel an lo la awm a. Tin, Class XII lamah pawh lo la bei nawn pakhat ka hmu bawk. Min lo ngai ve hle thin a. Thil tamtak min hrilh chiam.

Sikul siksawi danglam dante leh Registerte ka en kual thuak thuak a. Thil danglam a lo awm nual mai. He sikul hi ka chhuasan hnu khan Discipline leh thildang dangah harsatna an nghah tak em avangin Bible Society-a ka Life Member ngat kha a ni.

Principal inah ka zu kal leh a, ka hrilh lawk loh avangin a lo awm lo.

Uthlengate inah chaw ka ei

Ka U rual chu a ni hauh lo nangin ka koh laklawh tawh avangin ka U ta hmiah mai. Zirna lamah phei chuan HBC-a Asst Professor kha a ni hrim hrim bawk. Aizawla ka awm laiin an inhnuai hi ka luah thin a. Ka chungah an tha em em a, engmah ui an nei ngai lo. Puar taka chaw ka ei hnuin kan inkhawm leh ta a. Inkhawm kan zawh veleh Upa C Lalhmingliana’n ka lu chungah kut nghatin min tawngtai sak a, Missionray pui tura ka hawn avangin an lawm hle.

Inkhawm banah Taxi-a ka hawnna tur Ulapuii(Uthlenga thiannu)in min pe leh kher a; mahse ka hmang tangkai ta lo. Pu B Zara’n an car in min thlah a, ka lawm hle mai.

Nula inah vawikhatna a tan ka leng ve!

Eng tin tin emaw ni nula pakhat hian ka number hi a lo nei hlauh a. Thian inkawm ang hian vawi tamtak min lo message thin a. An in leh loa chuangkai turin min tih tlat avangin unaupa KC-a nen siruk la meuhin kan thawk chhuak ve ta.

In ka luh hian dar 10 a ri dawn hnai tawh a, a tlai ve khawp mai. “In in chu a nuam hle mai a” tih bak sawi tur ka hre lem lo. Mahse ka aiawh Lal hmaah a ding an tih ang deuh khan Unaupa KC-a chuan 'a thlun phelh' ang mai hian thu a sep ta mual mual mai le! Hahdam thlak tak a ni. Ani hi bialnu la nei ngai lo mahse THEORY lama sang chi a ni hrim hrim bawk a...

Zan a rei tawh avang leh a tuka Putlungasih pan tur ka nih avangin hawn hma ka rawt ta a. Hawn hun ka FIX ta khauh mai le. KC-a leh kan nula chu an nui ta char char mai. Zan dangah khatianga haw hun fix chat chat thin a la tawng ngai lo a ni mahna le!

Putlungasih lamah aw  

A tuk zing dar 7 (5^th Dec, 2011) velah Sumo-in Aizawl kan chhuah san ta. Ka rin ai daihin kawng a lo la tha a, lawmawm hle mai. Thing leh mau, tlangte chu hmuh a nuam hle a. Mahse ramsa leh nungcha an vang lutuk erawh ka tha a na hle mai!

Lungleiah hian motora min lo changtu tur an lo ruahman a. Mahse Lunglei ka luh tlai em avang leh Putlunasih ka phone tlang theih loh avangin motor chu Putlungasih lamah a lo let leh mek a. Mahse Saikuti hall bul a kan tlan laiin ka be pawp thei hlauh mai. Motor chuan Sazaikawn a lo thleng hman a, chuan him takin Putlungasih chu ka pan ta.

Putlungasih hi Pachang atangin ding lamah a lo peng a. Kawng a te deuh nangin kawng pangai aiin a zia lek lek mahse khuar thuk tak tak a tam.

Zan dar 6:23 ah ka tum ram Pathianin min hruai thleng

Zan dar 6:23ah tak Putlungasih ka thleng ta. Mission compound hi khaw tawntirha a awm a ni bawk a, a khua kan luh hun leh Mission compound luh hun hi a in ang reng a ni. Tin, Putlungasih ah hian bru an awm a. An khawsak a harsa em em a anmahni pawh an la fing lo hle. Hmanlai Mizo nun kha min ti hrechhuak.

Principal, S Lalramengi  leh a thawhpuite leh kohhran Chairman leh Secretaryin min lo hmuak a. An fel ka ti hle. Kohhran chairman leh Secretaryte hi Bru an ni a, Chairman zawk hian ka nu leh pa thlengin a lo hre fai kelh mai a! " I pa chu Chawngte pastor bial Secretary hlun alawm" a ti phei chu, ka nuih nasa lutuk. Tlabung ABC lamah ka pate nen an lo inzui ve thin ni ngei tur a ni.

Ka student turte chu 5 an ni

Principal nen time table kan set dun a hetiangin:

5:00 AM	5:15 AM	7:30-  9:00 AM	9:00 – 12:30 PM	12:30 – 1:30 PM	1:30- 4: 30 PM	6: 00 – 10:00 PM	10:15 PM
Thawh hun	Class	Chaw ei	Class	Chhun chawlh	Class	Class	light down

Chaw eikham kan hahchawlh hnu chuan naupang hmu turin kan phei dun leh a. Mipa 2 leh Hmeichhia 3 an lo thu van mai. Thuawih hmel tak tak vek an ni. Lehkha zir dan tur leh ka kalpui dan turte ka hrilh thuak thuak. An rin aia ka peih rei tur thu leh ning mai lova ti hram hram turin ka hrilh a.

6^th Dec, 2011 

December ni 6 zing dar 5:15ah kan tan ta. Linear equation in two variables atangin ka tan pui a, algebra chawhdan kalphung  an lo man lo hle mai a. Tihtur a tam tan hle mai. Chutiang zelin chhun leh chawhnu lamah pawh kan ti chho ta zel a.

Zan lamah erawh Science kan zir thung. An hriatthiam loh avangin vawn har an ti em em a. Optics lam atangin ka tan pui a. Nilenga lo au leuh leuh tawh ka nih avangin ka hah deuh hle mai a. Mahse ka tlingtla thei hram.

(Chhun zawm  tur)