ISUA KRISTA, REMNA LAL

Thuhmahruai

Mizoram – a mihring awmzat hi 1.116 million a ni a. Kan tam lo khawp mai. Andheri, Mumbai chhunga mihring awnzat hi 1.5 million a ni vet hung a. Chumi awmzia chu nuai engemawzatin Mizoram pumpui mihring awmzat aiin kan tlem zawk tihna a ni. Mahse harsatna tlanglawn tak tak kan tawk ve nasa a. Retheihna leh hna hmuhlona, corruption leh chutiang zelin pawl leh sorkar kohhran hrang hrang inkarah inremlohna kan ngah ve mai a. Political party han ngaihtuah ta ila: zahpuiawm khawpin an intawk na a, a nih dan tur pawh ni tho mah se. YMA lah ni se neuh neuh an nei ve reng a. Chutiang zelin MHIP leh pawl hran hran kohhrante pawh. Tin, kan hunpui neih leh hman thin tam tak: event hran hran a pawl ang zawngin, departemen ang zawngin, tin Anthurium festival, Thalfavang Kut, etc tih velte pawh hian Mizoram chhunga chengte lungawi diakna hi a thlen lo khawp mai a. Remna niah pawh mi thiam pui pui, intellectual ability nei sang tak takte pawh an inhnial chiam chiam a. Tun hnaiah pawh missionary day chungchangah inhnialna tullo tak a thleng leh a! Mahse chung zawng zawng kara hun pawimawh: mizote tam zawk rilrem em em: hlim leh lawm taka kan hman ho theih: mizote tana remna ni diktak nia ka hriat – mizote thinlungah khutah thisen zama remna tuhtu nia ka hmuh chu: Krismas hi a niin ka hria. Mizoram University hi a lo ding ve ta a. Anni khuan mizote tan thil chhen fakawm tak tak an ti nasa a. Entrina tha deuh mai chu: Rulngan…etc. Tun kum chhoa ka ngaihtuah tak mai mai chu: MZU-ah te khian Sociology lam emaw professor ni ta ila, research ka tih chak chu: Sakhuana tarmit bun miah loa Krismas – in mizote zinga inremna a pek dan leh nghawng vel hi a ni a. Sikul kan kal laite kha a ngaihawm ka ti thin: December thla a lo nih chuan advance Christmas kan han hmang ho a. Kohhran bil tih bik a awm lo, krismas hmang ngai lo kohhran zuitute thleng khan kan han hmangho thin kha a ni a. Kan thiante chuan krismas hlim takin hmang se tih kan duh a, krismas card nen an chhungte kan va wish a, kan inchah lawm lawm a. Kohhran ang zawng pawhin kohhran dangin an hman nawm poh leh kan hlim ve thin kha a ni a. UPC unau lamte an zai tui viau leh kan lo lawm em em thin a. Chutiang zelin Presbyterian lam carol han hmuh changte khan neih an gang pawisa kha kan vawmkhawm thin a. Kum a lo thar a, Krismas a zo a…’Krismas inhmang nuam em?’ tiin kan inzawt sup sup thin a. Eng kohhran nge an nih kan ngaihtuah ngai lo. Aizawl veng cheimawite chu a mawi poh leh kan lawm em em a, tu tih nge  a nih tih hi kan ngaihtuah ngai lo a, itsikna leh mahnihmasialna avanga inremlohna hian hmun a chang lo ni berin ka hria. Chuti taka hun pawimawh : sakhuana tarmit chu sawiloh khawvel tarmit atang pawha mizo society – a remna leh muanna thlen kawnga sulsutu ropui – hun pawimawh tak krismas a nihna anga Isua Krista Remna lal a nihzia sawi thei turin Pathianin a zahngaihna ka chungah a la lantir a nungdama min la enkawl hi ka lawm takzet a ni! 

BMCF Committee chuan November thla tawp ber Pathianni atang hian Krismas hmang tan ve ila, sermon thusawi pawhin Krismas lam hawi ni rawh se tiin Isua Krista Remna Lal tih chu thupui ni rawh se tiin an rel a. Kei hi kan hotute leh Pathian khawngaihna avangin thupui kick off turin min lo ti ve leh a. Vawiinah hian Isua Krista hi remna lal a nihzia kan zirho dawn a ni…

Mihring hian harsatna pianken kan nei a

Mihring hian mizia, a saptawng takin intrinsic property kan tihho hi kan nei vek a. Chungte chu duhamna te, mahnihmasialna te, hmangaihna te, khawngaihna te leh a dang tam tak kan nei teuh a. Hengte hian kan nitin nun hi min kaihruai thin a. A tha lam leh a chhelam hian kan nitin nun hi a nawr kal reng a. Thil relevant tak ka ngaihtuah fo pakhat chu : mahni tana tha duhna hi a ni a. Nausen pawh hi a pian tan tirhin a dam a ni tih prove – na hmasa ber chu a tah leh tah loh hi a ni a. A tah khan mamawh nei – a awmna pangngai ni loa awm ta hreawm ti thawi damna tura tap leh mi puih ngaia tap niin ngaih a ni a. Chutiang zelin biak theih a nih hma hauhin hnute a hne kawk kawk a. Anuin hnute a pai tam nge tam lo, a hman em hman lo emaw tih pawh ngaihtuah loin a riltamna tireh turin a tap vak vak mai thin a ni. Chhia leh tha kan han hre chho a, sikul kan han kal a. Sikul kan kal chhan chu : nakina kan nawmna tur niin kan pawm a. Chumi avang chuan class – ah compettion a lo awm a. Pakhatna nih tumin theihtawp kan han chhuah a. Tha ber, sang ber, nalh ber, awhawm ber, etc., nih tumin kan phili buai ta thin a. Mahse mihringa thil awmsa a ni… In lo chhut ve ngai emaw ka hre lo a. MMA sports pawh kan nei zo ta chiah a. Kha sports – ah khan enge kan sports laimu tak? Eng dang ni loin inelna a ni. Chak zawk nih tumin theihtawp kan chhuah a… a nihna takah chuan midang an chaklo dawn a…chumi avanga chak kan ni a…thillawmawm tak a ni hran lo. Mizo thalaite chuan football inkhelte hi kan en nasa a. Tan lam hi kan nei fur hlawm a. Kan tante chu chak se kan ti em em a…midang tlawm sela kan duh thin a ni. A chhan chu: chungnung zawk nihna khan keimahnia hlimna leh muanna min pe anga kan ngaih tlat vang a ni. Kei pawhin hian IPL – ah hian Arsenal club hi ka tan ve thin a. Ka buaipui lai tak tak chuan an chak ka duh thin em em a. Ka vei khawp a niang anmahni chak mai ni loin an hmelma hlun Manchester United chaklo laite kha a chang chuan Arsenal chak lai aipawhin hmuhnawm ka ti zawk thin a nih chu mawle. Chutiang khawp chuan keimahnia pianken nihna hian min kaihruai nasa thei em em a ni. Mahse sawi taw hang khan hetianga mihringte hi awm kan nih avangin khawel history – a innghirnghona zawng zawng pawh hi : duhamna, mahni hmasialna – kan thatna ber duhna avanga lo chhuak a ni a. World War a ni emaw Renaissance laia inthahna a ni emaw Sakhuana innghirnghona zawng zawng nen a hring chhuaktu chu keimahnia intrinsic property awma vang kha a ni. Sports pawh hi engvangin nge khawvel hian a ngaihpawimawh em em kan tih chuan keimahnia intrinsic property awm hrithlakna  a nih avang a ni. Greekho kha miffing hmasa leh thil ngaihtuah ril hmasate an ni a, anni khan infiamna sports – tuna  Olympic kan hman mek lo chhuahna pawh hi hmanlai 776 BC huna lo intan Greek ho Olympic a ni daih. Mihring indivual ngaihtuah loin pawl leh pawh kan lo nih a…state leh state, ram leh ram kan lo nih chuan keimahniah inelna – a tha ber duhna kha a lo awm a. Chu chuan tharumthawhna – indona te a thlen thin niin pawm a ni. Mahse tharum thawh zawng loa chinfelna chikhat chu – infiamna hi a ni a. India leh Pakistan hian engemaw ti chhung khan Cricket match an khel thei lo a…an khelhtheih loh chhung khan kan inkheltheih lai aiin kan inkarah innghirnghona a thleng nasa zawk niin pawm a ni a. Chumi awmzia chu, Sports – Cricket hmangin Silai telloin kan lo indo reng thin tihna a lo ni. Cricket World Cupahte pawh hian India – in Pakistan a hneh hi chuan North leh South India inmil lo em em te pawh hi an inngeih em em a… Lawm avang hian an biangah hian mittui a luang lo chauh ni hian ka hre thin…

Ka sermon tawp bera ka sawi ang khan mihringte hian kan tana tha tur kan duh avang hian kan che a, kan buai a…lehkha kan zir a…hna kan thawk bawk a. A nihna takah chuan chaw kan bar puk puk chhan pawh hi keimahni tan vang a ni a a chhan chu kan ei loh chuan kan thi mai dawn a ni…  mi hausa phei chuan ei tha leh tui an ei puk puk bawk a. Chumi engah chuan Sakhuana hian damchhunga kan mamawh piah lamah thihnu piah lamah pawh nawmna – kan hamthatna tur pe thei tura min tiam avangin mihring hian kan duh em em a, a hralh pawh hi  a tla em em a ni. A nihna takah chuan Science pawh hi khawvelin kan bawh chhan chu engdang vang ni loin kan khawsak nawmna min pek theih vang a ni a. Mahse sakhuana hi chuan chatuan nunna pawh pe thei anga a innchal avangin mi tam takin kan la lungrun em em a… tihloh tur thleng thleng kan tih phah niin  a lang a. Tunhnaiah pawh khawvel chawk buaitu chu Islam sakhua an ni. A nihna takah chuan Islam tih word pawh hi remna tih a ni hrim hrim a. A sakhuana concept – ah pawh hian remna duh sakhua an ni. A chian em em na chu Spain ram pawh hi tunhmain kum 400 dawn an lo awp tawh mahse harsatna thlentu an ni ngai lo. Chutiang zelin India ram leh middle east ram thenkhatte pawh kum 1000 chuang an awp tawh thin a mahse sakhaw dang tana hetiang em em hian harsatna thlentu an ni ngai hauh lo. Mahse economics takin ‘Human wants are unlimited’ an tih ang hian mahni hmasialna leh duhamna hian min lem zo a…midangte el duhna leh tha zawk nih duhna avang te, tuar lo zawk nih duhna avang te leh a dang tha lo tam tak avang hian kan lo buai ta niin  a lang. Kristianna pawh hi keimahni leh keimahni inkarah neuh neuh kan thlen tir a. Bible ringtu hmasate innghirnghona aia tur leh rapthlak tak tak in kan in tibuai ta a. Mahse a nihna takah chuan Isua Krista ringtu leh nun neitu kan nih loh vang mai a ni… A chhan chu sawi tawh ang khan mihringte hi mahni hmasial kan ni a kan duhthusama kan awm hian midangten min lo rem lo engang mah se keimahni chu inrem niin kan inhria a. Thlamuang takin kan awm thin a ni. Thlamuanna thlentu remna chu mitin mai hian kan mamawh a kan duh em em bawk a. Chulai thlamuanna leh hahdamna hmun thlen tum chuan a dik a mawi leh a fel pawh thlu loin kan han che ta thin a ni...

Ngaihtuah chian a  ngai…

Isua Krista’n ‘Rem len tir tura lo kal ka nil ova do len tir tura lo kal ka ni…’ a tihna khan gun taka kan en chuan Inremlohna atanga inremna siamna lam a hawi tih kawh a tum a ni. Van nena inremlo a ni tih pawh hre lem lo khan kan inrem lo a ni tih min hrilh a…chumi atang chuan inremna kawng a hawng ta zawk a ni. Chumi awmzia chuan inremlohna a awm loh chuan inremna a awm thei lo tihna a nih chu. A ni bawk reng a… Thil reng rengah hian kan harsatna kan identify phawt loh chuan solve theih a ni ngai hauh lo… chutiang bawkin inremna hi kan harsatna inremlohna atanga min chhanchhuaktu a ni. Inremna tih hi saptanwgah chuan Peace tih kha a ni a. Mizo tawnga kan pawm thiam dan ber tur chu Remna leh Muanna tih hian a hrilhfiah ber niin ka hria. Tin, Muanna tih hi Remmnain a ken tel a ni tlat bawk a. 

Rawngbawlpui duhtak te’n Isua Krista Remmna Lal tih zawngin thupui then pawimawh tak tak an lo sawi dawn a:

1.      Inremna awmzia

2.      Pa thiltum a ni

3.      Lei leh van inremna a ni

4.      Chatuan remna lal a ni

5.      Inremin awm rawh u

tihte a ni a. Ka sawi tui lutuk anga an sawi turte ka sawi nual ang tih ka hlau hle a. Mahse ka sawi dan approach atang hian kei chuan inremna awmzia leh inrema awm dan ka lo thlur bing dawn a ni. Kan inrempui tur chu mihring an ni mai thei tin Pathian pawh a ni maithei e…inrem tur chuan enge kan mamawh tih ka lo sawi dawn a ni.

Thildang sawi kai leh lawk the ang…

A hmaa ka sawi ang khan mihring pawh hian inremna – thlamuanna – hlimna leh lawman kan mamawh a. A tirah chiang takin ka sawi a. Hna kan thawh chhante kan hah em em chhan te thil kan tih ve hram hram chhan te hi engdang vang ni loin keimahni tana hlimna thlentu a nih vang a ni. Fate retheih kan hlau a… kan hriselloh kan hlauh avangin exert e kan la a…tin a thei phei chuan ei leh inte kan insum a. Chutiang zelin ngaihtuahna pawh seng vak loa kan thiltih apiang mai hian a tum tak chu kan tana tha tur thlentu a nih vang a ni. Hei chu hriatthiam a har lo. Miin mahni principle chu sawi loh Pathian a rinna pawh dah pawimawh loa a eiruk theihna chhante pawh hi engdang vang niloin amahah thlamuanna leh nawmna pawisa hmanga nei thei dawn anga a hriat zawk vang chauh a ni.

Mihring taka pawha automatic taka remna leh muanna (peace) kan um luih luih ang chiah hian natural phenomena – ah pawh hian dan zawm a nei a. Chu chu eng pawh hian equilibrium state, an tana nuam ber tha leh zung sen tlemna ber tur – ah awm an duh vek thin a ni. Entrina lo pe ta ila: tuna lacturn – ah hian lung tum kg khat dah ta ila ka a sir aka dah rual rualin a tla thla dawp nghal ang. A chhan chu engdang ni lovin helai a awm chhung kha chuan energy engemaw zat a nei a. A san zawng hi meter khat ni ta se energy – chakna 1 joule a nei tihna a ni. Chumi chu khawhral tumin leiah a tla thlawp mai dawn a ni. A chhan chu leiah a tlak chuan a san zawng zero a nih avangin zero energy an nei tihna a ni a. Chutiang zelin keini pawh hi thingkungah lawn ta ila kan lawn san poh leh keimahni hi kan stable loa energy (chakna) kan ngah tulh tulh tihna a lo ni. Kan lawn san poh leh kan tlak vaih chuan kan tla na dawn tihna a ni a. Kan fimkhur loha kan rah tleu zeuh chuan kan tla pawp mai dawn a chhan chu engdang ni loin mihringte pawhin remna leh muanna kan tana nuam ber duh ang chiahin natural phenomena zawng zawng pawh hian equilibrium state-a awm an duh vang  a ni. 

Hemi hrilhfiahna awlsam leh ber chu mihringin kan mut dan pawh hi a ni a. Medical lam zawng leh a biology ang zawng chuan sawi ta lo ila physics takin han sawi leh mai ila. A nihna takah chuan ding chung emaw utawk thutdan position ang zawng hian kan muhil thei chiang khawp mai a! Mahse chutiang chuan kan muhil ngai miah lo mai a. A nihna takah chuan kan din hian kan chau em em zawk thin a. Rei tak ding loin kan thu vat mai thin a. hei pawh hi a chhan chu eng dang niloin keimahni hian kan thutin energy kan nei tlem a equilibrium state lam kan pan a lo ni. Kan din khan ka lu hian rihna a neih avangin lei atanga a san zawng tehih energy a nei a. Mahse kan mut kha chuan kan taksa zawng zawngt kha khum nen a insi ta a. Energy kha khum atanga the chuan zero a lo ni ta a. Tui takin kan mu thei ta thin a ni…

A nihna takah chuan lum emaw vawt emaw kan tih chhan pawh hi he equilibrium law vang tho hi a ni a. Thermal equilibrium law an tih mai… Luman equilibrium law tih pawhin kan saawi thei ang chu. Chumiah chuan system pahnih hi ngaihtuah ta ila luma reng reng hi a sang atangin a vawtah a luang thla thin a, system pahnih lumna chu a inan hma chu a lum atangin a vawtah a luang char char thin. Thlasik laia vawt kan tih chhan chu kan surrounding a vawt vang a ni a. Kan taksa hi engang pawn lum mah se kan awmna bul vel a vawh miah avangin lumna kha kan taksaah atangin a luangchhuak char char mai zel a. Pawnlam kha degree celcius 5 vel lek a nih chuan kan taksa lumna kha pawnlam lumna zat chiah degree celcius 5 a nih hma chu a luang chhuak char char dawn a ni. A nihna takah chuan kawrlum pawh hian kan taksa tang alumna lo chhuak tur kha a veng chauh zawk a ni a.  Min tilum a ni ngai hauh lo.

Awle helaia physical thilthleng – phenomena ka sawi the kher chhan chu mihring nunphung chauh ni lo nature hrim hrim hian equilibrium state – awmna hmun tha kan lo mamawh vek a lo ni a. Mihringah chuan chu chu hlim taka awm a, thlamuanna neih veng veng kha a lo ni. Ka sawi tawh angina sakhua miin a zui chhan chu damchhunga nawmsa taka a awm tum vang leh thihhnu piah lam ngaihtuah a chatuan nunna a chan duh vang  a ni. Mahse mihringte chuan intrinsic property tha lo tak tak kan neih ve avang hian equilibrium state kan va thlen dan hi a fuh tawk lo thin a. Mimal tana thlamuanna – remna kan duh lutuk avang hian keimahniah inremlohna a lo thleng thin zawk a ni. 

Mihring leh mihring inkara imremna piah lamah inemna dang buaipui tur a awm em?

Kristian background nei vek kan ni a. Eden huana sual lo luh dan kha kan hrechiang vek ang a. Khata Setana lo thlem dan pawh kha a philosophical implication ngun taka kan en chuan mahni nawm duhna – thlamuang tak leh nuam taka awm duhna a ni. Adama pawh khan a dang zo loa. A laia theirah an ei khan Pathian anga awm a nuam taka awm duhna kha an neih a ring tlat a ni. Chumi avang chuan sual lei leh van chu inremna chu a lo hrang ta a. Pathian lakah mihrang kan lo ni a. A tira hlim taka awm thin kha sualin min han ngaisa tak tak ta a. Khawvel chu buainain  a lo khat ta a. Tuna ng hian retheihna, natna, tualinthahna, indona leh thil duhawmloh pui pui a lo thleng ta chel chul  a ni. A nih chuan Kristian inzirtinaah chuan keimahni mai ni lo Pathian leh keimahni inkarah pawh hian inremlohna a awm tihna a lo nih chu… 

Mamawh chhanna Isua Krista

Helaia inremlohna pahnih kan sawi: keimahni inkara inremlohna leh Pathian nena kan inremlohna daidangtu lo siamtha tu chu Isua Krista a ni. Thian duhtakte u, kan zui Isua Krista hi kan mamawh chhanna neitu a ni a. Kan tana inremna thlen tu a ni. Vawiinah hian inremlohna avanga thilthleng: indo thutang te, tualthahna te, inenksawrna te, chhiatna te, tawk tu kan ni mai thei mahse chiang taka ka sawi duh chu he khawvelah hian tihpalhthilthuin kan lo piang lova…A chatuan remruatah kan tel ve a ni tih hi kan pawm a kan rin chuan he’ng harsatnate hi kan sukiang thei ang tih ka ring em em a ni. Inrem tur hian Isua Krista bak hi kan model a ni thei lo hrim hrim…

Engvangin Nge Isua hi inrem turin kan role model a nih theih?

A hmasa berah chuan kan inremna turin a inngaitlawm miau  a ni: Tirhkoh Paula khan Philipi khua kha a zin vawihnihnaah a va tlawh a. Ludi leh tang vengtute chhungkua a tipiangthar a. Kum reilote hnuah kohhran nghelnghet tak: kohhran ding hmasate zinga kohhran hrisel tak a ding nghal a. Mahse vanduaithlak tak main tunlaia kan harsatna tlanglawn ang chi tam tak hi an tawk ve ta tlat mai a: itsika leh mahni hmasialna avangin Philipi Upate chu an in tibuai tlat mai. Philipi bung 2naah khan a ziak ta a. He bung hi thuhriltute’n Isua Krista rilru leh nihna diktak sawi lanna atana hmangin chang 5na atangin an chhiar tlang pui thin a. Mahse a contextual background kan en chuan a fuh chiah lo deuh niin ka hre thin. Sawi tawh angina kohhran hruaitute zinga buaina awm kha thelh a tum a, Isua Krista inngaihtlawmna kha entawn turin a duh a ni. Chang thumnaah phei chuan atira kan sawi : intrinsic property kan tiha kha a lo sawilang ta chiah a…engtin nge a inziah kha? ‘ Mahnihmasial tak leh inngaihhlut avanga engmah ti lovin, rilrua inngaitlawm takin, mitinin mahni aiin mi dang tha zawkah ruat theuh zawk rawh se…’ tih a ni. A chiang khawp mai! Rema thlen tur chuan inngaihtlawm a lo ngai hle a nih chu… A ni lah tak a… Thiandun buaina a ni emaw nupa buaina a ni emaw eng buaina pawh nise tlawm zawk kan awmloh chuan inremna kawng zawh hi a lo harsa khawp mai! Mihrimg tak chuan a harsa ang mahse Pathian nen chuan engkim kan tithei a ni…

Inngaihtlawmna laka mi daltu chu enge ni ang? Ingaitlawm theilote hi tute nge ni thin? Mi chapo emaw engemaw ni ve tawk riaua inngai an ni duh tlang pui. Acadmics lamah pawh hian thil pawm dan tlanglawn deuh mai kan nei ve a chu chu: a hrethlem apiang an chapo  inngaihtlawm an harsat thin tih hi a ni. Hei hi chu a dik khawp mai! Keimahah hian ka chiang… BSc kan zir ve lai kha chuan hre ve emaw kan han in ti a: syllabus kan lo bel ve deuh bawk nen thiam ber emaw kan han in ti a…kan inla ve lah mai a. Universityah topper te kan han ni ve a…ropui ta viauah kan han inngai a. Mahse IIT lamah master kan han zir chiah mai chu… kan tlawm ngawih ngawih mai ni! Kan zir tam tulh tulh a, kan thiamlohzia leh engmah kan nih loh zia hi ka inhrechiang lutuk a kan tlawm ngawih ngawih mai ni… Pathian zarah PhD te kan han tichho leh ta zel a. Hriattur leh zir tur – miin an lo beih nasata zia leh Pathian thilsiam ropuina te kan han hmuchho zel a…kan tlawm ngawih ngawih mai ni!

Amaherawh chu thil pakhat paih theih miah loh ka nei a: mite ang em em chu ni lo mah se ka thil thiam ve selh sawlh, sports lam a ni emaw keima academic line lam emaw pawh nise miin min lo underestimate ringawt mai hian tlawmah ka la ta thin a…rilru tha lo hi ka pu la pu ta tlah thin  a nih chu mawle… A hahthlak thin khawp mai a chang chuan. Tun August thlatawpah pawh khan kan research groupah hian MSc zirlai hi a lo tel thar a. Meeting kan neihnaah presentation ka pe a. Ka presentation pek tawp lamah chuan theory taka ka lo chawh chhuah mahse experiment taka ka tih theih loh vawi tam tak ka professor nen pawha kan sawi dun tawh chu ka sawi kai leh hlek a. Ka sawi tawp hma hmain kan nau, Bengoli, MSc lo join thar chuan intihrelutukin a lo sawi zuah zuah a. Mahse ka thinin a tuar ta thlawt lo… Professorte pawh zah zolivin marker ka la sauh sauh a white board – ah minute 30 dawn reng mai ka han hrilhfiah a nih kha…a bul atanga tawp thleng…ka sual ve khawp mai ka sawi chhung zawng khan amah chiah ka en bawk a. Ka professorte pawh khan ka lungawilo hle a ni tih an hre thei. Meeting neih zawhah chuan Mizoram ami hi BSc ka zirlaiin ka classmate a an thiamlo viau a mahse nang chu I dang hle mai a han ti hram a. Ka rin ang deuh ngeiin min lo underestimate ve viau a lo ni a thin a rim hnuhnawh leh a… mahse heipawh hi overcome dank a hria a ka apply tawh bawk. Chu chu Isua Krista inngaihtlawmna entawn hi a ni mai ni… Tuemaw zawk zawk an tlawm chuan adanga pawh an tlawm ve mai zel a ni. 

Mihring leh Pathian inrem theihna tura Isua Krista inngaihtlawmna Pu Tirhkoh Paulan a lo ziah hi tuna Isua Krista ringtute tan hian a relevant ka ti khawp mai! Kohhran hruaitu in tibuaite chu va thelh a tum a , ‘ He rilru Isua Krista pawha awm kha nangmahniah awm rawh se..Ani zawngin Pathian anga awma Pathian tluka awm chu thilthlak hlelh hleih theihah a ruat loa….’ tiin chiang lutuk maiin Isua inngaihtlawmna a lo ziak a ni. Khawel tak pawhin a hretlem apiang kan chapo ang chiah hian Thlarau rawngbawlna lamah pawh hian Isua Krista nihna diktak hretlem apiang hi an chapoa inrempui hi an har thin niin ka pawm a. Keimah pawh hi ka in checkna ber pakhat pawh a ni. A chang chuan keini aia naupang leh pawl ang zawng pawha hniam fe zawkte laka kan inremna tur a nih chuan zawldawh zawk leh tlawm zawka tan ngaih chang a lo awm thin a. Harsa ka ti thin khawp mai! Mahse Isua Krista chanchin ril lutuk – Pathian ni si, kan inremna tura A thilsiama lo chang, inngaitlawm em em hi ka ngaihtuah chang hian ka dinhmun nep lutuk hruaitu nihna emaw zirsang zawk ka nihna emaw upa zawk ka nihna emaw atang hian ka inhnukhniam vet ur a ni lawm ni tiin ka inngaihtuah thin a ka tuiral ve chiang thin khawp mai! Isua Krista hi kan hmangaih a a thihna leh thawhlehna kan tawmpui takzet  a nih chuan kan inkarah inremlohna te a lo awm changte hian kan status – kan nihnate hi kan hlipthla thin dawn lawm ni? Chu tak mai chu inremna tura Isua Krista’n a rawn hlenchhuah chiah kha a ni bawk a. Kan tih ve ngei a ngai a ni…

A sawi zelnaah phei chuan kan inremna turin ‘A inngaitlawm a, thi khawp hiala thuzawmin a lo awm ta a…’ tiin a ziak hial a ni. Ka ngaihtuah chiang thin a miin an inremloh chuan tuemaw zawk zawk an sual tihna a ni a. Emaw pakhat chauh zawk a sual thei bawk a. A enga pawh chu nise inremna tura ingaihtlawma inphahhniam hi chu a la zia ka tia amaherawh chu inremna tura thihna khawp hiala inhlanna hi chu a ropui hi ka ti khawp mai! Khawvelah hian rukruk hmang emaw kan tana thatna duh ngai reng reng lo engtik lai pawha kan tana chhiatna duh thinte nena inrem tura ka nunna hlan tur hian tunhnu hian ngaihtuah pawh ka ngaihtuah ngai lo reng reng. Mahse Isua Krista hian keini misual nun tlak lo : sual kan ni tih pawh hre lo hi Amah nena kan inrem theihna turin A nunna  chu a hlan ta a nih chu mawle… 

Tette atanga mission field –a sikul kal leh seilian – kohhran chi hrang hrang: Pathian rawngbawltu ti vek te innghirnghonaah hian ka awm thin a. Keini chu tete atanga puitling sa: harsatnate hi nu leh pa hrilh loin ka nu leh pate hian an harsatna min hrilh sela solve sak tu ni ila ti mi hi ka ni a. Awlsamtein thil nihphung leh kalphungte hi ka man chak khawp mai! Pawl 5 ka zirin ka piangthar a… chumi hnu atang phei chuan Pathian ram zau nana thawk theuh theuh kohhran inghirngho hmuh hi a hreawm ka ti thin khawp mai! Vei pawh ka vei a… Mizoram kristiante harsatna tawhah chuan min burden ber tu a ni… College kal tan kum atangin kum tin thlakhat chhung ka fehchhuak ve leh zel a, mission field – ah tun thleng hian. Rinna lamah kan puitling tulh tulh emaw kan intih lai hian hetiang harsatna hian min la burden khawp mai! Share chi nia ka hriat ngailoh avangin kumin pawh khan tumah ka hrilh loa… Ni 27 chhung Tuikuk berh ve tak tak – vaihmite hnuaiah zing dar 6 atanga zan dar 10 thleng lehkha zirtir a darker 13 dawn dawn din rengte kha a hautak a appreciate dan an thiam loh avang te khan tlawmah ka la ve viau a. Mahse hei aia min kaput leh min mawlhtu lian zawk chu Pathian rawngbawltute innghirnghona bawk kha a ni… A chang chuan ka vei mah mah a thahnemngaih dan tawkte hi ka thiam lo thin a…mi tam tak rilru pawh hi ka tina thin niin ka hria. Mahse a mihring ang zawng hian tumah va huat hi ka nei lem loa. An thiltihdikloh lai nia ka hriata hi ka va haw ta zawk thin a. Mawngkawhurte haw lova homosexuality haw zawk tura kan inzirtir ang khan… 

Tun tum ka Mission Field-a ka han hawn pawh khan zan khat chu zan dar 10:30 velah ka class bang ka haw hi Baptist Mission Compound bula tlangpawha Theihai buk hnuaiah hian Presbyterian lam unaute’n an Revival Speaker rawih mek hian inremna chungchang a lo sermon chiam mai a… A sawi zawh thleng ka ngaithla a…rilru hi a nuam lo khawp mai! Thingpui ina lo leng turin ka thlen inah chuan ka sawm ta a… Sawi tur a va vanng em Pathian hmaah hian… Mahse kohhran tena kan thil tihdikloh tam takte hi Pathian tana thahnem kan ngaihna vang a ni tih ka chiang em em mai si… Thahnemngaihdan kan thiam loh avanga Setana lawmna kan thlen thin tur hi a hreawm ka ti a ni. A hma chuan inngaihtlawmna – inphahniamna hi ka vawng hlur a hemi bak hi ka thleng thei lo. Mahse kumin chhoah hian helaia kan inremna tura Isua Krista’n a nun a hlanna ka ngaihtuah chian hnu hian ka insawhkeh ni berin ka hria. Nun hlantu ni tur chuan hmangaihna neih a ngai. Thih ngama va tan lam ni loin Isua Krista angin thih thlengin kan inngaitlawm dawn tihna a lo ni. Tunah hi chuan Pathian chatuan rauhmannaah hian ka telve tih ka chiang a. A hniaka zuitur ka nihna angina tlawm ral thak hi ka pawi ti lo khawp mai… Thian duhtakte u vawiiah hian kan inremna turin Isua Krista a inngaitlawm a van ropui a kalsan a leimia a lo tanna chauh hi kan hrethiam chin a nih a kan inremna turin thihna rapthlak tak a tuar tih hi kan hriatthiam lo la hrethiam thleng phak lo a nih chuan kan entawn tur Isua Krista hi a nihna zawng zawng kan la entawn thei dawn lo tihna a ni, kan Kristian nunah hian. Inngaihtlawm avanga inphahniam chu a zia a, thihna khawp hial tuara inremna hna thawh hi chu a ropui thlawt a ni! Tunah hian kan hrethiam ta a nih chuan Thlarau Thianghlim tanpuina dilin danglam kan tum dawn lawm ni…

Pu Tirhkoh Paula hian inremna tura Isua Krista thihnaah hian a thusawi hi a titawp mai lova ‘Ani chu nasa takin a chawimawi ve ta thung a. Hming zawng zawnga hming chungnung bera chu a pe ta a…’ tiin a ziak a ni. Mizoram hi society ang zawnga ka thlir hian ngaihdan philosophy nget tak mai hi ka nei ve a. Mizoin a titheih sang ber leh ropui ber chu : nu leh pa chawimawi hi a niin ka hria. Bible zirtirna a nihna piah lamah hian min hringtu leh enkawltute chawimawi hi kan tih ngei ngei tur niin ka ngai tlat a. Naute min be ve neuh neuhtu hi ka nei ve nual a. A tam zawk chu zirna chungchanga advice pe tura min duhtute hi an ni tlangpui a. Result tha tak tak: Mizoram puma an lannate pawh min lo hrilh ve thin… Chuta ka rilru lo lang hmasa ber chu ‘Ani hian a nu leh pa a chawimawi…’ tih hi a ni thin. A thiltih khan a chawimawi a ni lo a mahse a thiltih a that avangin leh entawntlak a nih avangin a nu leh pa kha a chawimawi a ni zawk a ni. Chumi a chhapah piangthar diktak an nih phei chuan Isua Krista fapa – a roluahtu diktak an nih avangin Pathian pawh hi automatic takin an chawimawi niin ka hre thin a. Ka hlim veng veng thin! 

Chumi awmzia chu inremna siamtu kan nih chuan engkim tithei Pathian hian min chawisang anga min chawimawi dawn tihna a ni. Kan chan tur hi a ropui em a nia aw… Namai lo tak a ni! Mihringin min chawimawi pawh eng tih thu loh a nia Lei van siam tu Pathian ropuiin min han chawimawi tur hi chu a vanneihthlak ka ti thin! Amaherawh chu chiang taka ka sawi duh chu chawimawi duh avanga inremsiam tumtu kan nit ur a nil ova. Isua paw’n min hmangaih avangin kan inremtheihna turin thihna kraws a lo thlang khan keini pawhin kan inremnan a tawp thleng ral kan huam tur a ni tih lam a ni zawk a. Chutah chuan chawimawi kan ni zawk dawn a ni…

Kan thian chu a ni pha chiah lova nau anga ka en lehkhathiam tak mai hian tumkhat chu MSc a zir laiin missionary  atan Pathian hian min ko niin ka hria a rawn ti thut mai a. A piangthar tha chu tih ka chiang a. Mahse lehkhathiam tak chu PhD han zo sela University emaw research institute lamah emaw professor nise Synod Mission Board –in a tirhtheihlohna hmunah missionary angina awm se ka ti khawp mai a… MSc first class first – ah a pass a. South India a zirna Univeristy tha ber pawlah topper a ni thelh a. CSIR NET a exam a JRF a hmu nghal bawk a. Mahse a rilrua kohna chu a thi thei tlat lo mai. A thiante a zirpui thin a aia tichhe thinte chuan (amah hi pakhatna a ni thin) medical doctorte an zir a, PG tih an tum a…ropui an tum em em a. Ani pawhin a chak thin…a chhungte pawhin PhD Physics zir ngei ngei sela tih an duh a, an thlem thin a ni. Mahse tawngtai ngat ngat hnuah pawh kohna chu haider theih loh nia kan hriat avangin missionary hna chu a dil ve ta a. Nimin khan Synod Mission Board chuan a tlingte an lo tarchhuak ta a… Pathianin hotute kaltlangin missionary nih a rem ti a ni tih kan hrechiang a kan lawm hle mai… Missionary an lak list kha ka en tha leh thin a. A ni tluka academic record nei tha tur leh thiam, zirsang kha ka hmu theiin ka inhre lo.

Mahse ani chuan mahni hmasialna leh duhamnate avanga inremna lo thlentirtu chu dahthain Pathian nena inremna leh thlamuanna duhawm zawk a thlang niin ka hmu a…ropui ka ti khawp mai! Interview an neih lai pawhin a academic record a tha si a, ‘Zir zawm leh duhin I haw daih lovang maw…’ tiin. Mahni nawmna zawnga thahnem kan ngaih hian midangte tan harsatna thlentu – inremlohna thlen tu kan lo ni thin a. Chumi dahthaa Isua Krista tana inpe a, kan nawnma tur ni loa Isua Krista’n min hmangaihna chhanlet nana a nawmna kan ngaihtuah a a ram tihzau kan tum hian kan kristianna pawh hi a lo dik mai dawn niin ka ngai thin. 

Vawiinah hian Pathianin min hmangaih avanga kan inremtheihna turin vanropui tak inngaitlawma kalsana te, thihthlenga kan inrem theihna tura a nun a hlanna hi ngaihtuah thar le hang u hmiang. Isua Krista hmangaihna chhanlet dan chi hnih: mahni dinhmun phahniama inngaihtlawm leh thih thlenga kan inrem theihna tura tuartu a nih dan hi inenfiah leh the ang u…

Ka khuaa ka Nutlani hian hmangaihna hi a ngah bik khawp mai a. A fate lo pawh hi a fate anga en thei hial khawpa mi danglam a ni. A fapa chu a lo sual tlat mai a… Thingtlangahte chuan mipa sual chu kar loah tlang hriat a lo ni a. Rukruk leh sual chitin reng ti ta chu tlang huat rawn a ni der mai… Mahse ka la hriatreng chu: miin engang pawn a fapa kha sawisel mah se a sual poh leh ka Nutlani khan a hmangaih zual sauh sauh a. A rila rah – ama hrin ngei mai kha a hmangaih  tlat  a ni. A fate fel deuh deuh ai pawhin a duat zawk hial a…tawngtaisak chu sawi loh a enkawl hian a enkawl a ni ber mai! Pathian pawh hian kan sual poh leh min hmangaih a…chumi awmzia chu a laka kan tlanbo nasar poh leh emaw kan inremloh poh leh min hmangaih leh zual a ni… Tirhkoh Paula phei chuan Sual a pun poh leh khawngaihna a pung a tiin Korinth mite  a hrilh hial a ni. Thian duhtakte u vawiinah hian min remlotute hi thalo zawkin kan hmu palh a nih pawhin Isua Krista hmangaihna avang zawk hian mahni dinhmun kalsanin thih thlenga inngaitlawm turin remna kawng zawh kan tum dawn lawm ni…

Atira ka sawi ang khan mihringte hian intrinsic property nei kan ni a…chu chuan duhamna leh mahnihmasialna hmangin kan tana nawmna tur leh tha ber neih theih tir min tum a. A thenin mi chanai kan eiru a, a thenin mi rilru kan tina a, a thenin tual kan that a, a thenin ruk kan ru a, a thenin nihna kan duh a, chutiang zelin inremlohna thlentu leh siam chawptu automatic takin kan ni thin. Vawiinah hian Philosophical implication pe zawnga lo sawi satliah ka ni loa mahse hei hi a Pathian thu si a ni. A pawimawh ber chu: Isua Krista’n min hmangaihna avang hian hmangaih let ve ila mahni tana nung loin min hmangaihtu tan nung ta ila chu chuan inremna a siam ang. Kan hrethiam em aw… Inremnalohna chu mahni nawmsakna ngaihtuah lutuk avanga lo chhuak a ni tih kan hre tawh a. Midang tana nungte tan inremloh a theih loh ti ila kan sawisual tam pui lo bawk ang. Missionary – ah chuan hmingthannate, sanna te, ropuina te kalsanin a inpe ta a, chu chuan inremna awmze diktak a thlen a ni…

Eric Liddel kha kan hria em aw… Scottish tlanchak lutuk a ni a. Cambrigde University – ah lehkha a zir a. Chuta a zirlai chuan inkhel nasa khawp mai a… 100m race – ah hian a hunlaia Olympic-a record ai pawhin a tlanchak zawk a. 1924 Paris Summer Olympic – ah tlan turin British chuan a ko ve a. Mahse vanduai thlak takin Sunday – ah a tlan a ngai tih a hria a. Pathian – a conviction thutka nei chunga Pathianni serh tura commitment a siamna avang chuan tlan lo turin thu tlukna a siam ta a. Chanchinbumi leh British mite dem a hlawh em em a. Hreawm khawpin a chanchin an sawi a ni. Han tlan sela chuan Bristish tan khan Gold Medal a  la dawn tih kha an hrechiang lutuk a mahse Pathian ropuina avang chauha tlan thin Eric Liddel – a chuan Pathian leh a inkar a ngaipawimawh zawk a. A tlan duh ta lo… Tunhnu hian ka mithlaa ka  ngaihtuah chhuak ziah thin: a tlan duhlo ni chuan Paris khawpuia biak in pakhatah thu a sawi a, Isaia 40:31 hi a chang thlan a… ‘Those who wait upon the LORD shall renew their strength; they shall fly on wings like eagles; they shall run, and not be weary; and they shall walk, and not faint’. 

Kan piangthar hian Isua Krista thihna leh tawhlehna hi kan ring a ni satliah miah lo a nia. Thil hi chu kan ring thei teuh mai… Mumbai hi India khawpui zingah mihring awm tamna ber a ni tih pawh kan ring thei alawm. Amaherawh chu ka nunah nghawng engmah a nei loang. Chutiang chauha Isua Krista thihna leh thawhlehna ringtu kan nih chuan a awmzia loang. A thihna leh thawhlehna hi ka thihna leh tawhlehna a ni tih kan rin rual hian Amah nena relationship nei turin kan intulut   a ni a. Kan tihngai loh te tih a ngai tawh a kan tihfo te tihloh  atul tawk zawk thin  a ni. Vawiinah hian Isua Kristaah piantharna diktak kan dawng a nih chuan, A chatuan thil ruahmannaah hian a zahangaihna avangin kan telve a ni tih kan pawm a nih chuan, kan role model Isua Krista, Amahin inremna kawng a zawhna kawnga example a rawn set hi kan nunpui thei dawn lawm ni tiin kan infuih mawlh mawlh a ni!

I nunnah harsatna lo thleng thin mahse,
Aw ringtu chau in zam mai suh ang che;
I harsatna A hnen thlen la,
Nangni thawkrim leh phurrit phur zawng te,
Ka hnen rawn pan ru hahchawlhna in hmu ang;
Tiin Krista chuan nang leh kei min sawm,
Mamawh chhanna famkim a ni.

Chanchin Tha hril hi kan tih mak mawh a ni

Thlaleh ni 24 – 27 chhung khian retreat kan nei dawn a. Kan hruaitute’n retreat lam hawiin vawiin atangin sermon hun hman nise tiin hun changtute an ngen a. Kei hian a bul tan nan ka lo hawng dawn a. A nihna takah chuan BMCF Retreat Opening Ceremony a nih deuh ber mai chu…

Albert Einstein – a hi kan hre theuh anga. Ani kha, science thiam turu lutuk – Juda pa chak Pathian hnam thlante zing ami a ni. Kristian a ni lova tin Juda Sakhua pawh a zawm lem lo. Ani khan thusawi lar deuh mai a nei a. Chu chu kan hriat theuh ka ring a: Science without religion is lame, science chu sakhuana tello chuan a kim loa, kebai ang a ni a tihna a ni. Hei hi hriatthiam tum chhin phawt teh ang: 

1543 khan Nicolaus Copernicus khan Ni hi he kan universe laiah hian a awm a. Chuan Ni chu Thla leh arsi, kan awmna lei hian a hel a ni, a ti a. Chumi chu Copernican Theory an ti a. Mahse Aristotle – a khan hetiang hian ngaihdan fumfe lutuk Copernican Theory – ah chuan a zawt ta a: ‘Khawvel hi a che a nih chuan lung kan vawr hian engah nge kan vawr chhohna hmunah vek a lo tlak let leh? Boruaka a awm chhung khan khawvel hi a chet si chuan kan vawrna hmun atanga a piah deuhah a tla dawn lawm ni?’ tiin. Sawifiahtu an awm loh avangin Copernican Thoery anga Khawvel a che tih chu a dik lo tiin miin an pawm a.  

Galileo – a khan a aia nasa zawkin Copernican Thoeory – khawvel a che anga pawmna kha a lo cho tha leh a. Ani chuan khawvel hi second khatah kilometres 32 vela chaka a thlawh chuan engah nge lung kan vawm hian kan vawm chak zawng leh khawvel kal chak zawng hi kan belh ngai loh? Lung vawm chak zawng ringawt hi kan hriattheih chin a ni a, khawvel kal chak zawng hi belh tel ila chuan a na viau dawn si a tih hi a ni a. Galileo – a vek khan a chhana a ngaihtuah chhuak a. Lawng chhungah chuang ta ila, lawng chu a tlan chak dan pangngai rengin tlan reng sela chuan lung vawr ta ila lung chu kan vawr chhohna zawnah tak a lo tla leh dawn a. Mahse lawng kha lung kan vawr chhhoh hnuah tlan chak thut ta se lung kha kan lung vawr chhohna hmun piahah a tla dawn a lo ni a. A nih chuan Lawng kha che miah lo ta se lung kan var chhoh kha kan vawrchhohna hmun ngaiah bawk a lo tla anga, lawng che (mahse chet dan speed pangngai reng) leh lawng che miah lohah chuan thil tehdan phung (physical laws) chu a inang reng tihna a lo ni. Chumi awmzia chu Corpernican Theory hmangin Khawvel hian Ni khi hel mah se thil teh zawng zawng chu thil che miah lo anga kan teh ang hian a teh theih vek tihna a lo ni a. A chhan chu Khawvel hian Ni a hel hian a hel chak zawng hi a pangngai reng vang a ni. Lung kan vawm paw’n khawvel thlawh chak zawng kha belh a ngai loa. Chutiang zelin Lung kan vawr pawhin hmun dangah tla lovin kan vawr chhohna hmunah bawk a lo tla leh mai zel a ni. 

Lawng kha a chet loh lain lung I vawr chho a, ding takin a lo tla let leh a. Tin, lawng kha a kal chak dan pangngai renga I kal tira lung I vawr chhoh kha ding takin I kutah bawk a lo tla leh a ni tih kan sawi tawh a. Mahse thilbuaithlak a awm tlat mai! Lui kamah mi pakhatin lo thlir ta che sela, lawng a chet loh laia lung I vawr chhoh kha ding taka lo let lehin a hmu anga mahse lawng a chet laia I vawr chhoh, I tana ding taka lo let leh kha chu ani chuan a tla kual angin a hmu dawn ta tlat mai. A chhan chu I awmhmun atangin lawng kha a chet sawn miau avangin lung I vawr pawh kha a che sawn a. I vawrchhoh khan lungin a kawng zawh (trajectory) chu luikam atanga lo thlir tu tan chuan a kual dawn tlat a ni… a nih chuan lawng chhunga chuang leh lui kam atanga lo thlirtute’n an thil hmuh chu a inang ta lo tlat mai! Tu thlir dan nge dik zawk ang le? 

Mahse ngun taka kan ngaihtuah chuan a inang reng a ni. Khilaia Galileo – a ngaihtuah ang khian a chetloh lai leh a chet laia kan tehna kha a inang reng a. Chuvangin lawng kal chak zawng kha luikam atanga thlirtu tan kan belh emaw kan paih emaw  a ngai a lo ni a. Chu tak mai a chu Galileo – a relativity theory chu a ni ta a ni. 

Kan hrethiam em aw… Entirna awsam zawk han pe chhin ang hmiang: Step – ah darkar khatah km 2 a chakin I kal chho a, chumi zawhah step kal thei (escalator) ah I kal chak dan pangngainn I kal chho leh a. Step kal thei chu darkar khatah km 4 a chakin che ta sela I kal chak zawng chu I thianpain lo teh ta se, step kal theiah chuan darkar khatah km 6 lai a ni dawn tihna a nih chu. Chumi awmzia chu I kal chak zawng leh step kal thei kal chak zawng kha a belh a ni. Hetiang hian Galileo – a khan a lo sawifiah a ni. Thil tam tak kan hrethiam ta!

Kristian scientist turu lutuk Maxell – a khan eng hi khawiah pawh kal sel a kal chak zawng  a inang reng a ni a ti a. Tin, eng pe chhuak tu pawh kha eng anga chak pawn kal mah se eng kal chak zawng chu a inang reng dawn tihna a lo ni a. Motor hma light kha han ti-eng ta ila eng chu second khatah km 300,00000 a chakin a kal anga, tin motor chu darkar khatah km 100,00000 vela chaka tlan pahin light chu han tieng ta la eng kal chak zawng chu a pangngai reng dawn a ti a ni. Mahse Galileo – a theory atang erawh kha chuan a dik ta lo a. Motor pawn lam atanga lo thlirtu tan chuan eng kal chak zawng kha second khatah km 400,00000 a ni dawn tihna a ni. A nih chuan eng kal chak zawng leh motor kal chak zawng I belh tihna a nih chu.

Helaia thil inkalh (contradict) lai hi Einstein – a khan a thlurbing ta kha a ni a. Thil kal chak zawng tehna chu velocity emaw speed (v=kal thui zawng/ hun hman zat) emaw ni ta se. Thil reng reng a kal thui zawng kha a hun hman zata I sem chuan a kal chak zawng – velocity I nei dawn tihna a lo ni. Kal thui zawng chu ‘d’ ni ta se, tin hun hman tam zawng chu ‘t’ ni bawk ta se, hetiang hian kan ziak thei ang: v=d/t tiin. A nih chuan Lunglei atanga Lawngtlai hlat zawng hi km 77.1 a ni a. Darkar 10 chhungin tlan Lunglei atangin Lawngtlai tlan theng ta ila kan tlan chak zawng chu darkar khatah km 7.71 a ni ang. A nih chuan km 77.1 hi darkar 10 in kan sem tihna a lo ni. 

Mahse eng kal chak zawng chhutnaah chuan a chunga kan formula neih khi a hmantlak ta tlat lo mai! Motor atanga eng kan tihchhuah kha a kal thui zawng ‘d’ ni ta se, tin a hun hman zat chu ‘t’, chuan a kal chak zawng chu ‘c’ ni bawk ta se. A chunga kan tih ang khian hetiang hi kan hmu ang a: c=d/t.

A nih leh motor kha second khata km 100000 a tlan khan engtin nge ni ta ang le? Motor a tlan ve bawk a, eng pawh second khatah km 300000 laia chaka a chet avangin tunah chuan a kal thui zawng ‘d’ kan tih kha a lo danglam ta, a hma aiin a kal thui ta tlat mai. Buaithlak deuh mai chu a hun hman zat kha a la pangai reng si a… Engtin nge ni ta ang le? Maxwell – a theory hmanhin eng kal chak zawng, ‘c’ kha a danglam thei si loa. A nih chuan ‘t’ hi a danglam a ngai tihna a lo ni a. A nih chuan pawn atanga thlirtu tan hun chu a kal muang ta tihna a lo nih chu. Kan hrethiam em aw??? Hei tak hi Einstein – a theory of relativity kan tih kha a ni a. Interstellar kha kan en tawh awm aw… kha kha hemi principle hmang hian siam a ni. Twin’s paradox an tih kha a ni a. Pakhat leiah a awm a. A lo tar bawih a, van sanga thlawk erawh chu a la tar miah loh kha…hei hi Eisntein theory of relativity an tih kha a ni a.

Einstein – a relativity theory hian hrinchhuah mak pui pui mai a nei teuh a. Chung zinga ngaihnawm deuh mai chu rihna nei apiang hi an kal chak tulh tulh a, eng kal chak zawng tluk thuaka an kal hian chakna thahrui (energy) an nei tam tulh tulh thin a ni. Formula kan hriat lar em em, E = mc² tih hi tuna kan sawi mek hrilhfiahtu a ni a. Nuclear bomb, nuclear thahrui kan tih zawng zawngte pawh hi hetiang avanga lo awm vek a ni. Einstein – a khan Germany lamin he a formula atanga bomb an siam theih mai a rin avang khan America – in Nuclear Bomb an neih theih nan khan President Theodore Roosevelt hnenah lehkha a thawn a. Chuan Manhatan Project kha an kal pui a. Hiroshima leh Nagasaki – ah 1945 khan bomb chu an thlak ta a. Mahse kha bomb khan mihring pawisawi lo nunna a la nasa em em a. Scientist tam tak rilru a tina a. Chung zingah chuan Nuclear bomb siam a nih theih nana formula hmuchhuak tu leh siam tura nawrtu Albert Einstein –a pawh khan pawi a tie m em a. A rilru a na hle a ni. Chuan nunphung, philosophy of life lam hi a ngaihtuah chho zel a, tuna a thusawi : Science without religion is lame tih hi  a lo sawi chhuak ta a ni. Science sakhuana tello chu a bai, kim lo a ni tihna a ni ber a nih chu. 

Mihring taka kan ngaihtuah chuan science hian malsawmna tam tak min thlen a. Science avangin silh leh fen, ei tur, nitin khawsakna – in leh lo, motor, mobile phone, thil tam min pe a. Hei lo liama malsawmna min pe theitu a awm loang tih mai theih a ni. Mahse scientist turu lutuk hian engvangin nge sakhuana tello science chu engmah lo mai a ni  a tih tak le? A chhanna leh a nihna tak chu – sakhuana hian thil tha a zawn vang  a ni. Science chuan finna hrim hrim a thlur bing avangin thiltha bakah thiltha lo pawh a hmuchhuak teuh a. Chung thil tha lo chu mihringte nunphung tibuaitu a ni tlat mai si a. A nih chuan atom bomb hmuhchhuah pawh chu thiltha lo tihna a nih chu, a chhan chu mi pawisawi lo nunna tam tak a lak vang  a ni. Mahse sakhuana chuan thil tha a zawng a, mihring tana tha lo chu a hnualsuat zel a. Chuvangin science chu sakhuana angin mihring tana thil tha chauh a hmuchhuak tur a ni ti ta a nih chu.

A nihna takah chuan mihringte hian pianken, saptawngin intrinsic property an tih ang hi kan nei a. Chu chu mahni tana thil tha duhna hi a ni. Chaw kan bar puk puk chhan te, lehkha kan zir chhan te, theihpatawpa hna kan thawh lawp lawp chhan hi a nihna takah chuan keimahni mimal nawmna duh vang  a ni a. Chutah tak chuan sakhuanna hian kan damchhung mai ni lovin thihnu – ah pawh nuam taka nun theihna min pek a tiam avangin miin an ngaipawimawh em em a, a hralh pawh a tla em em a ni. Mahse hemi kalh, opposite zawng chiah hian mihringin kan lawmem em nunphung tiawmzia tu chu kan lo nei a. Chu chu midangte tana nun hi a  ni a. A nihna takah chuan chhungkua pawh hi a zahawm chhan chu, society – ah hian hun leh hmun pawimawh tak a chang a a chhan chu, mahni hmasialna kalh a system awm thei nghet a nih vang a ni a. A nihna takah chuan midangte tana nun hlan pawh hi a ropuia miin kan ngaihsan chhan chu keimahnia awm intrinsisc property kan tih mahni hmasialna opposite chiah a nih vang a ni. 

Kan hriat theuh tawh angina mihring chu social animal kan ni a. Mahnia khawsa thei lo in mahawh tawn vek kan ni. Kan nitina kan thil tih apiang hi midangte tana tangkai a ni tur a ni a, chumi chu keimahniah a tha zawngin a lo let leh chiah tur a ni. Hei hi sorkar hna kan thawh chhan pawh a ni a. Thlatin hlawh kan lak piah lamah hian chhan awmze nei tak a awm a, chu chu midangte tana tangkai hi a ni. Ka sawi fo thin a keimahni research community – ah pawh hian… Miin tax an pe a, mi hausa atanga rethei ber thleng – slam area – a awm pawhin chi pocket khat a lei atanga a tax pek zar zo a research ti thei kan ni tih hi. Mi khan tax kha an pe satliah a ni loa, an pek chhan chi society nuam an siam duh vang  a ni. Keinin pawisa chu society nuam zawk, better society siam nan hman tumin hna kan lo thawk ve ta thin a. Society tana tangkai tur thil thar hmuchhuah tumin laboratory – ah te hna kan thawk ve lauh lauh a ni. Paper publish emaw thesis tha deuh neih piah lamah hian mission tihtur pawimawh lutuk kan lo nei theuh a ni. 

A nih chuan kristianna tarmit bun miah lovin secular thlirna tlang atang pawhin midang tana nun chu a lo tul viau a kan tihtur makmawh a ni a, kan ti mek a ni tih kan hre thei a. Mahse chu aia nasa leh thuk zawkin misual thi tur chu kan dam theihna turin mahni hmasial lovin, a nun chu midangte tan kalvari tlangah a lo hlan ta a ni. Midangte tana tangkai emaw nun emaw kha kan tum rau rau a nih chuan an tana hlu ber chatuan thihna lak atanga pumpelhna dan hi kan hrilh thin dawn lawm ni tih hi ka lo sawi tum ber a ni, vawiinah hian. Isua krista thihna leh thawhlehna tawmpuitu kan nih hian midangte tana malsawmna turin Kristian nun hi kan hmang em aw tih hi ka ngaihtuah nasa thin khawp mai. Kan thiante an ni emaw chhungte an ni emaw keimahni tana mithar an nih hian kan hmuh hmasak berte hian kan rilruah hian enge lo lang hmasa ber thin aw tih hi ka ngaihtuah nasa thin khawp mai…zirna lamah enge a an? A rilru a tha nge a chhia? Etc tih vel hi a lo lang teuh thin ka ring. Mahse Isua Krista ringtute tan chuan chutiang mi kan hmuhte chu a piangthar tha em? Chhandamna awmzia a man em, a paw mem? Chhandam a ni em? Ringtu diktak a ni em? Tihte hi kan ngaihtuah thin dawn lawm ni? A hmaa ka sawi ang chiag khan khawvel taka kan lo pian chhan chu – midangte tana tangkai a nih ang chiah khan kan Kristian chhan pawh hi midangte tan – khawvel mai bakah a piah lama chatuan nunna an neih theihna tur a puih hi Isua krista kan zui chhan a ni tih pawm tlat hi kan tihtur a ni tlat  a ni. 

Isua Krista la nei tak tak lote nei tura hnathawh – evangelism hi kohhrante buaipui tur a ni tih hi kan pawm tlang em aw? Biak in tha neih emaw pawl ram zauh lam emaw hi a nih loh zia mai chu Pathian faka chawimawi emaw Bible chhiar emaw chauh pawh hi ringtu nun khingbai lutuk a ni thei a ni, evangelism lam kan buaipui loh chuan. A chhan enge ni ang? A hnung kan zui mek, a thu thua awm tura kan intiam Isua krista khan chanchin tha – chatuan nunna a nihzia hi midangte hnena hrilh turin min duh tlat a ni. Ti turin min duh a ni satliah loa Amah pawhin a tum – mi zawng zawng chhandam rawngbawlna mission kha kan chhunzawm a ni. Helaia lo inkhawm a, Amah fak a zai, lawmthu sawi emaw dilna tawngtai neih emaw thilpek pek emaw te hi Kristian tihtur a ni loe ka tihna a ni miah lo. Mahse chu aia pawimawh zawk: Isua krista thupek ‘kal ula hnam tin ami zirtirahte siam ula’ a tih hi a awm tlat a ni. Isua Krista chauh hi hlimna tluan tling thlentu a ni a, tin sawi tawh angin chatuan nunna kan neih theihna turin a nun a hlan a, chu chu midangte la hre lo leh la hrechiang lote kan hrilh ngei tur a ni. 

Vawiinah hian chiang taka ka sawi duh chu evangelism hi Isua Krista thupek a nih avang chauha ti tur kan ni loa. Amah kan hmangaih avang zawkin kan ti tur a ni tih hi. Ka sermon hnuhnung bera ka sawi ang khan A nihna takah chuan kan rinna laimu pawh hi he hmangaihnaa innghat hi a ni. Isua Krista hi dan bantu ni lovin dan leh zawlneite thu tifamkim tura lo kal a ni a tihna pawh hi he hmangaihna hian a hrilhfiah khawp mai. Amah kan Lalpa Isua Krista’n eng tin nge a tih kha? ‘Nangni min hmangaih chuan ka thupekte inzawm ang..’ a ti a nih kha. Hetah hian thupek zawm chu hmangaihna lantirna a ni e a ti hauh lo. Tin, thil nihphung pawh a ni lo. Hmangaihna avangin hmangaih takte thu zawm lam a ni zawk a ni. Miin midang a hmangaih chuan automatic takin chumi duh dan chuan a awm mai thin a ni.‘Chu chu tirawh emaw kha kha tisuh..’emaw a khauh taka thu inpek lam a ni lo. Isua Krista hian hmangaihna tawp lovin min hmangaih a kan hmangaih let ve a, commitment kan siam a nih chuan tun hmaa kan tih thinte kha kan ti thei tawh loa chuan kan tih ngai lohte tih a tul tawh zawk a lo ni. A thupek pawimawh tak mai, ti tura min duh chu kan hmangaih a nih chuan kan ti ngei dawn lawm ni…? Thian duhtakte u kan hrethiam em aw...

Kristian lo dinchhuahnaah hian Paula hi Isua dawttu – Second founder of Christianity tih a ni hial a ni. Paula leh Isua zirtirte, ringtu hmasate kha engah nge an danglam em em tih hi ka ngaihtuah fo thin a. An danglam chhan ber nia ka hriat chu – Isua Krista hnung an zui vang a ni. Isua Krista hniaka zuitu tih hi amah fak chawimawi emaw inkhawm emaw ringawt hi a ni miah lo a nia. Isua Krista khan enge a tih kha? A tisa put lai ni khan Samari, Judea leh Galili ramah khan enge a tih kha? Thlaraubo zawngin a vak vel tiraw? A nih chuan Isua Krista hnung zuitu anga kan inchhal chuan a tih ang hi kan ti ve dawn lawm ni? Chu a chhapah a thupek a la ni leh nghal a nia aw. Pu Tirhkoh Paula khan a man chiang ka ti khawp mai! A hniaka zuitu a nih theih chhan pawh hi engdang vang a niin ka hre lo… Isua Krista hmangaihna bawk hi a hrechiang em a ni! Engtin nge a tih kha? ‘Krista hmangaihna chuan min tirlui a ni…’ a ti a nih kha. Kan piangthar a, Krista avanga nun thar nei tawh kan nih chuan Krista hmangaihna hian la hre ve lote hrilh turin min tirlui dawn lawm ni… Helaiah hian tirlui tih hi tilui, tih ngei ngei ngai – khalh chhuak tihna a ni. Krista hmangaihna – kan tana a nun hlanna hi kan chhanglet takzet a nih chuan loh theihlohin a kan bul hnai amite la hre lote kan hrilh ngei tur a ni.  Hetah hian logic a awm a, chanchin tha hi kan hrillo a nih chuan, Isua krista hmangaihna hian min tirlui thei lo tihna a ni. Min tirluih theih loh chuan hmangaihna avanga min chhandamna hi kan pawm chiah lo tihna a nih chu…ringtu suak kan ni tihna a ni! 

Mahse sawi ang ngawt hi a ni loa. Harsatna tam tak tawk chungin chhandamna hna hi kan thawh a ngai tlat a ni. Engmah chu ni lo nangin keipawh hian mission field – ah kum tin deuh thaw ka kal ve thin a. Harsatna tlanglawn tak tak paltlang tur a tam khawp mai! Kumin pawh khan June thla chhung kha mission field – ah sikul ka han pui a. Mahse thil awlai a ni miah lo… A nihna takah chuan mihringte chuan ego te kan nei ve a. Pathian zarah kan Mizoram chhungah chuan kan batch-ah nan a chuan kei tluka ambitious e mem thlen san tum tak hi an tam lutuk lo maithei a ni. Helaiah India rama zirna tha ve ber pawlah kan zir ve a. Tu khaw kha pawhin an hriat loh bru zirlai naupang va zirtir chu a tlawm tlak ka ti khawp mai. Mizoram chhohna tur air ticket ka lak dawn a ka rilrua lo lang lian ber chu he thil hi a ni a. Tlawm thlak piah lamah helaiah Phd leh MTech tih vel class kan lak lain High School han zirtir kha chu a inpawhhniam thlak hi ka ti a. An veng VCP te’n kan fanu tuition pe turin nakum kum tirah lo haw leh la tia min en mai mai nihte kha hreawm ka ti ve khawp mai. Tin, ka thiante leh chhung thenkhat ten khu laiah thilropui tak I zir emaw tih laiin helaiah tuikuk pawl sawm zirlai zirpui mai mai a. I hna hmuh tur chu a sang lem lo maw tia min han tihte kha ka bengah hian a cham reng a. Tin, x+x=2x a ni tih hre lo ngawng lutuk, zing dar 6 atanga zan dar 10 thleng ni 25 vel chhum lo chat lova zirtir kha chu peihawm pawh ka ti lo. Mahse Pathian hi hmangaih turin commitment ka siam tawh a, ka hmangaih chuan a thupek ka zawm anga a duhdanin ka awm tur a ni tlat si a! Mahse Pathian hi a lo tha khawp mai! Malsawmna tamtakin min vur thin! June thla chu ka nghak ta ngat ngat a…cont.

Thian duhtakte u, vawiinah hian Pathian thu cross reference pek vak vak a sawi pawh ka tum lem lo. Tin change maw lai sawifiah pawh ka tum lo. Ka sawi duh ber chu – mihring takin, khawvel takin kan pianchhan chu midangte tana malsawmna thlentu nih hi a  ni a, intellectual takin society nuam thlen tu kan ni tur  a ni tih hi. Chutianga nung ve tur hian Krista hian a huang chhugah hian min duh a ni sa tliah loa. Midangte malsawmna thlentu nih piah lamah chatuan nunna Krista hmanga pe tu kan nih hi a tul tlat a ni… Vawiinah hian tih theih pakhat kan nei. BMCF chuan 24^th – 27^th Sept, 2015 chhung hian retreat kan buatsaih dawn tih kan puang fo tawh a. I thian te, unau te, chhung te Isua Krista hniak hnung la zui chiah lo an awm chuan lo kal ve turin i sawm dawn lawm ni? Thlarau Thianghlim tanpuina dil chungin kal ve turin kan ngen dawn lawm ni? Tin hetah pawh hian chhandamna nei lo kan la awm chuan kan kal ve ngei dawn lawm ni? Ni khat emaw ni hnih emaw chu eng tin tin emaw nitin khawsak buaipuiin kan hmang ral ve mai zel asin… Nitin khawsak thil rel aia pawimawh chatuan nunna hawlhthleng thei avang hian ni khat emaw ni hnih emaw chauh chu kan serhhrang ve dawn lawm ni? Kan damchhunga min puitu pawh a ni maithei asin…kan dam chhunga hun pawimawh kan hriat reng tur pawh a ni maithei asin…’

Isua Krista hnung zui – rawngbawltu in tite hian vawiinah hian engtin nge kan tih dawn le? Krista hmangaihna chuan min tirlui ve thei dawn em? Min tirlui loa thildang tullo tak tak kan buaipui zawk a nih chuan Krista hmangaihna leh chhandamna hi kan chang lo tihna a ni mai, Check list pawiawh lutuk ngaihthah theih miah loh a ni. Paula bawk khan ‘ Ka chungah tihmakmawh a tla a…’ tiin Chanchin Tha hrilh a piangthar lote pian thar tir chu tih ngei ngei ngai niin a pawm thlap a ni. A nih chuan piangthar rawngbawltu tan chuan tih ngei ngei ngai, pumpelh theih miah lo tihna a nih chu…kan hrethiam em maw…Sawi tawh anga khan rawngbawlu kan ni emaw helaiah hian sermon sawi thei kan ni emaw inkhawm chairman ni thei kan ni emaw tan tu etc pawh ni ila Isua krista chhandamna thu hi midangte hnenah kan hrilh a kan evangelistic loh chuan a dik lo tihna a nih chu…kan man chiang deuh em? Ka sawi tawh kha helaia zai vak vak emaw tawngtai vak vak emaw Sunday apianga lo inkhawm hi chu a ve mai mai a nia aw…chanchin tha hi kan hrilh si loh chuan engmah a awmzia lo! A nihna takah chuan Pathian kan fak te, thilpek kan pekte pawh hi midangte thinlunga Isua thusawina kawng hawnna chi khat – rawngbawlna pawimawh lutuk a nih avang zawkin a awmzia a ni chauh zawk. Chutiang ni loa mahni nawmna emaw Kristian kan nih avanga lo inkhawm emaw mai mai tur angah kan inngaih chuan a fuh miah loang! Paula khan a sawi zelnaah phei chuan ‘Chanchin Tha hi hril suh ila ka chung a pik dawn si a…’ a ti hial a ni. A sawi awmzia hi kan hria em? Tui hi in lo ila kan thi dawn tih kan hria tiraw….tui hi kan in loh chuan kan chung a pi kanga kan thi ang ni reilote hnuah. Chutiang chu a ni a sawi tum ni, Paula hian. Chanchin Tha hi Kristaa nun thar nei tawhte chuan an hril ngei ngei tur a ni tih hi a pawm dan a ni tlat a ni… Vawiinah hian ngun takin I ngaihtuah ang u. Kristaa nun thar kan neih chuan kan bul hnai amite chanchin tha kan hrilh thei lo maithei mahse retreat-naa kal turin I sawm ang u hmiang. Cell meet –ah, Bible study-ah kal turin I sawm thin ang u.