Khuhhawnna
November 30, 2011 a lo ni ta reng mai. Dan rual lohvin kan hun leh nite hi a ral zel mai si a. Midangte tana kan thiltih erawh chhiar tur a tlem hle mai. Thahnem ka ngaih loh piah lamah hian mi tibuaitu leh mi ngaihdan ti mumal lotu kan nih mai mai chang hi a va tam dawn teh lul em!
Tute nge ka kawm thin?
Helai “Eng maw?” tih tur pawh awm mang lohnaah hian tute nge ka kawm tamte ni ang aw tih ka ngaihtuah neuh neuh mai. Ka thiante a nung chunga ka kawmte hi chu tulna avangin kan inzui thin a ni mai a. Mahse ka thinlung zawng zawng- ka hlimna leh thinrimna lo ti thawkchhuak thei thintute chu ka ONLINE FRIENDte hi an ni tlat mai.
A bik takin misual.com lama ka thiante hi an tla na vawng vawng hle. Tamtakte hi chu ka ute leh ka nu leh pa rualte vek a ni a, zahtheihloh chhuahin kan iak ve mai mai thin a ni. Han ngaihtuah chiana an khawvela awm chuan a inthiamawmloh thin em em. Mahse anni pawh hian tunlai khawvel finna leh thiamna sang zelah hian UPAT ringawtin puitlinna hi a pek theihlohzia hre ve sela ka duh thin hle.
Eng vangin nge ka bo dawn?
Mizoram lama hawng miah lovin helaiah hian ka tihtur ang ang tih ka duh hle a. Ka mentor duhdan pawh a ni; mahse khawvel zawng zawng chunga roreltu kohna anga ngaih thil ka nei leh ta tlat mai. Helaia ka kawm thin- Pu Vakulate, Pu PKFanaite leh midang tamtakte thawhhlawk bikzia ka hmuh hian ka inhmu te rem rem a ni.
Baptist Church of Mizoram hian Bru khaw pakhatah High Sikula a din a; mahse result tha an neih lohna a rei ta hle mai. Tin, Mathematics leh Science teacher an neih theih loh vang a ni pakhat bawk ang. Kumin session tan tirh khan result that beiseiin Principal tharte an ruat a, result tha kan neih ngei theih nan kei hi Thlasik chawlh hun chhungin chu Pawl 10 zirlaite ka enkawl ve dawn a ni.
Ka huphurh em?
College ka kal lai khan hetiang hian Bru sikul lamah hian ka lo thawk ve thin tawh a. Bru naupang enkawl hahthlakzia hi a taka changtu ka niin ka hre ve tawh. Tunah pawh hian tunhmaa ka kal tawhna khua nen khawhran daih ni mah se an zia chu a inang leh dawn a ni. Naupang enkawl hi namai lo thin khawp mai.
Kan khua ka thleng dawn lo
Kim taka ka thlasik chawlh hman dan tur ka blog lama update tura min ngentu an awm avangin ka lo ziak zel mai ang e: Kum-pui-lingleta Maths leh Science an zirtur kha thla khat chhunga ka zirpui a ngaih dawn avangin khawiahmah ka khawmuang hman dawn tlat lo mai. Tuna ka awmna atang hian a rang thei ang bera hawn par par a tul dawn a ni. Min thlahleltu - thenrual tha leh chhungte awm mah se ka hman loh avangin ka tlawh hman dawn lo tlat.
Kum hnih zet kan khuaah ka haw ta lo bawk a, ka chhungte hian krismas tal chu an zinga hmang turin min duh hle a; mahse tulna avangin Bru ho bulah hmang liam ve leh mai dawn a ni. Mahse pawi ka ti lem lo khawp mai. Zailenkhawm nuam an ti a, an lam peih bawka, keiin nuam ka lo ti vet ho bawk sia…tha kual vel vek mai.
2011 Krismas hlim takin aw ka thian
Pathian hmangaihna hi sawichhuah thiam mai mai theih loh – ril em em a taka chan chi a ni. Kan sual tlan nana a fapa a lo tirhna hi a turu-na piah lamah hian thil mak a tling a ni. A lo pian hian kan sual tlan nan a thi dawn a, A thi ta reng bawk a ni tih hi chhuizawm zel ta bawk ila a va tha leh zual dawn em!
Le, ka thian hlim takin kumin krismas chu lo hmang ang che.
‘A va mawi em lalna ram thlir chu
Kan tan Bethlehem tlang a lo vul ta
Hman a pi leh pu ten an hmuh phak loh
Saron par tlan in kan leng e’ tiin hlim takin I lo hmang dawn nia. He thuziak I chhiar hun chuan internet lamah ka lo inlar thei tawh lo vang.
Kan tan Bethlehem tlang a lo vul ta
Hman a pi leh pu ten an hmuh phak loh
Saron par tlan in kan leng e’ tiin hlim takin I lo hmang dawn nia. He thuziak I chhiar hun chuan internet lamah ka lo inlar thei tawh lo vang.
Tun kum Krismas-ah hian huntha nei ngei ngei ang che!
