Emotions!

With KC-a @ IIT Powai Lake

Thuhma 

A rei ve leh ta deuh. Pawl XI ka zirlai khan Pu Ravi Zakarias, Christian apologist lar tak sermon pakhat ka ngaithla fuh hlauh mai a. Chu a sermon chu ‘Worship a clue to meaning in life’ tih a ni. Tah chuan Zakaria khan ‘Ýou cannot worship God without emotions’ ti zawngin a sawi ta daih mai. Pathian emotions mihringa lo lang leh keimahni-a emotions chungchang a sawi ta chiam a. Ka rilru  a hneh hle mai! College Aizawl lamah kan kal a, EMO an ti emaw kha a lo lar hle a. Kha thil khan emotions concept tha lo zet mai Mizo thalaite zingah a lo tuh tlat mai! Hriatna leh thiamna-in a tlin tak tak hmain Philosophy lam hawizawngte-in emotions lam chu ka’n zir tha leh ta a. Remchanna apiangah ka sawi ve zel a. Tunah pawh hian ka lo ziak leh duh a ni.

Rationalism aiah emotions

Tun kum zabi liam ta laihawl vel – 1960’s chho vel khan existentialist philosopher ho kha an lo lar chho nasa hle a. A chhan chu rationalism paihthlaa emotions lam hawizawnga philosophy kha an kal tir (hrilhfiah) vang a ni. Rationalism chu awlsam thei ang berin chhia leh tha hre tak chung leh fing kar (logic) chunga ngaihdan siamna hi kan ti thei mai ang chu. Emotions lam erawh chu hmangaihna, khawngaihna leh lainatna avanga thutlukna siam lam hi a kawk thei ber ang. 

A fiah leh zual nan entirna pe chhin ang aw

Sikulah zirtirtu I ni a. Sikulah chuan dan zawm lai kan nei vek a. Tihtur leh tihloh tur tamtak a awm a. Chung chu Principal leh a thawhpui – zirtirtute’n dan a nih angin an kengkawh thin. Dan pakhat hetiangin nei ta ila – Zirlai naupang zurui chu hnawh chhuah tur a ni, tiin. Naupang zurui an awma man an nih chuan hnawhchhuah an ni mai dawn a ni. He laia dan kenkawhna hi rational taka thil tih – dan zawmna ang chi chu a ni mai a. Mahse Principal emaw zirtirtute emaw-in an khawngaihna avangin naupang chu an ngaidam thei a, sikulah an la kaitir thei tlat a ni. Chu chu emotions avanga thutlukna chu a ni thei ang.

Isua inpekna-ah hian a chiang ber mai!  

Isua hi Lei leh Vana lalber a ni a. Keini  hi a fate kan ni. Min chhandam tura lo kal chu rational taka ngaihtuah chuan thil theih miah lo a ni. Pathian dinhmun leh mihring dinhmun chu inang lo hle a. Mahse hmangaihna (emotions) avangin Pathian chu he leiah hreawm tuar turin a lo kal ta a ni. Office khata lal ber thin kha rational taka ngaihtuahin hmunphiattu a ni thei ngai lo vang. Mahse Isua chuan a thei tlat!

Kan thusawi tum-ah let leh ta ila 

Chuan sawi tawh angin existensiallist philosopher ho kha an lar chak khawp mai, a hun lai khan. A chhan chu rationalism paihthlaa hmangaihna, lainatna, khawngaihna leh adangte hmanga philosophy an kal pui khan innghhirnghona te, inthahna te a tlem phah tlat a ni. A chiang reng a ni tiraw Isua Krista mihring a lo channaah hian… Khawngaihna leh hmangaihna avangin kan tan he lei hrehawmah hian a lo vakvai ve ngei  a ni. Chumi avang chuan inremna a lo awm si a…

Isua Krista emotions lo lang kha 

Lazara thihna [Johana 11:1 - 44] avanga Isua hmangaihna live taka lo lang hian ka rilru hi a hneh leh zual em em thin. A awmzia a thuk em em bawk! Thlan a va thlen khan Isua kha insum zo lovin a tap tlat mai. An lungngaihna kha lainatna leh hmangaihna avang khan a tuarpui ve a. Isua Krista hian Lazara hi a va hmangaih awm ve aw ka ti fo thin… Hmun danga a chet dan nen a inang hauh lo mai. Lazara kha a tho leh dawn tih pawh a hre reng. Mahse a tap ve tlat mai. A tawpah phei chuan hmangaihna avangin Kraws-ah a thi hial a ni e!

Nu emotions pawh hi…

Mihringah hian nu hmangaihna hi turu zia an sawifo thin. Harsa takin thla kua chhung an pai a. Thlan leh thisen sengin an hring a, chumi hnuah hnute tuiin an chawm leh thin a. Ka la hriat reng chu ka nu nena kan inzui chhuah chang hian, ‘I nau a riltam a ni ngei ang, ka hre thei tlat’, a ti fo thin. Chu chu hmangaihna avanga lo awm a nih pawh ka ring. Kan farnu neihchhun chuan kum 2000 khan  Pathian hnenah min chawlhsan hlauh mai a. Khata ka nu tah nasatzia kha aw! Ka pa khan a hmangaih ve lo ve ka ti hauh lo; mahse ka nu, hmangaih em em tu khan emotions a tilang nasa lehzual ni maiin ka hria. 

Pathian hian chhan nei vekin thil a siam a, a ruahman thin

Keimahni-a emotions awm pawh hi chhan neiin a siam a ni. Chhan nei han tih hian hriatthiam a har maithei. Entirna mawlte pe ang hmiang: thil sa tak – mei alh lai hi kan kutin han khawih ta ila automatic deuhin kan pawt let nghal vat ang. A chhan chu kan kut kha mei-alhah kan dah reng chuan a kang ral mai dawn a, a na leh zual sauh dawn tihna a nih chu. Chutiang bawk chuan emotions hi hmangaihna lantirna turin Pathian-in a lo siam a ni. Mi rethei tak leh khawngaihthlak tak takte kan hmuh hian engtin emaw talin kan danglam thin em? Kan hmangaih berte’n mual min liamsanin kan mittui a lo far thin tiraw?… Beisei tur awm tawh miah lohna hmunah tanpuitu i neihin I biangah mittui a luang tawh thin em? A nih loh tal pawhin mi rethei I tanpui a, an lawm em avanga an bianga mittui luang I hmu tawh ngai em aw…

  

Mittui tlak naran hi a tha e ka ti hauh lo

Mittui tihtlak theih reng hi a tha e ka ti hauh lo. Mahse emotions hi Pathianin keimahnia awm hmangaihna tihlanna atan min pek a ni. A chian em em na chhan chu I mittui titla theitu hi I unau a ni emaw, I fanu, fapa a ni emaw tihnat I phal ngai lo ang. Ísua Kalvari tlanga thihna I ngaihtuah chang hian engtin emaw talin I danglam thin em? Isua Kraws mak tak chungah chuan tih hla sak laite hian I danglam thin em? Isua kan hmangaihna hi lantir zel ang u, min hmangaih avangin A nun kan tan a hlan si a!

 

Bangalore Mizo-te leh Tv Lalhmachhuana

Courtesy: Fela Ayala. KLE Boys' Canteen-ah Mizo zilraite nen.

Thuhma
Tun tum chu mahni line lam ni lo mahse mut dawn leh hun awl ka neih lai vela ka rilru-a lo lang ziah thin hi ka’n thai ve mai mai teh ang.

 

Shillong atangin
Shillong khi mizo-te tan hmun chhinchhiahtlak a nihna tamtak a awm. Kan mithiam hmasate chhuahna leh mizo thu leh hla (literature) tam tak  chhuahna a ni ve a. Chuan mizote tana thil tha lo tak – Mizoram Presbyterian leh Baptist Church of Mizoram lo inthenna chhan bulpui an ni bawk. Presbyterian leh Baptist hi thurin lamah pawh inang lo tak ni mah sela tunhma khan an inpawh hle a. Hei hi kan zosapte vang a nih a rinawm. Tunah chuan kan inpalai tawn thei lo a, harsatna tlawnglawn tak tak kan inkarah a awm ta reng mai! Shillong lamah khian tun thleng hian Baptist leh Presbyterian chu thubuai la neiin an la court reng a. Hei pawh hi VAN COURT-ah ngaihtuah ni se a fel daih tawh ang mawle.

Sawi lut tawh ila

Bangalore pawh hi India khawpuiah chuan mizote tan hmun pawimawh tak a ni ve reng mai. Mizo awm tamna, a bik takin Pathian thu zir awm tamna hmun a ni. A then phei chu thiamna sang tak tak nei – institution thaa mi pawimawh tak ni pawh an awm a ni.

Pawl (denomination) ngai pawimawh miah loa rawngbawl – Pathian leh A thu ngaipawimawh zawk anga rawngbawl theih hi a lo hlu hle niin ka lo hria a, Mumbai lamah ka awm ve hnu hian. Mahse Dt. 30. 10. 2011 khan Bangalore Mizo Kohhran, Presbyterian Church of India chu a din thu puan a lo ni ta a. A tirah kha chuan tet lai atanga kohhran ngai pawimawh tak atanga lo selian ka nih avangin ka lo lawm hle a. Serh leh sang an khawih thei anga ringtu pungkhawm chu an intichak leh thei zual ang ka lo ti rilru ve a. 

A pawi leh ta zawk
Mahse ka beisei angin thil a kal ta tlat lo mai. Mizo Kohhran a lo zikchhuak dan hrang hrangte leh a duhlo te’n an sawi dan han chhut khan mizo mipui zingah titi a ti tam ta! Bangalore chu Shillong ang mai a ni leh dawn emaw ka ti hial a ni. A hun lai khan Social Networking Site lamah han lut ila titi thupui hot ber a ni tlat a ni. Kei ngei pawh hian ka comment ve zeuh zeuh thin a. Mahse a pawng ataka hotute dem hi ka tihtur ni loa ka hriat avangin ka sawi ril lutuk ngai lem lo a. Kha tih lai khan Bangalore Mizo kha an mualpho niin ka hria. A chhan chu an lungrual lo tlat a ni. Kan awmna-ah leh hmun dangah pawh Kohhran din duhna lehkha chu pek an ni ve vek tho a mahse inthendarh duh lovin an pawm lo mai zawk a ni. A hre deuhin an sawi dan phei chuan India khawpui thenkhata Kohhran din tuma hi Bangalore atanga lo chhuak a ni, an la ti deuh deuh leh nghal a. A zia lo khawp mai!

Kan tlangval a bo tlat mai
Hun a lo kal zel a. Kum 2013 kan lo chuang kai ve leh ta a. February thla laihawl vel khan Bangalore lam bawk hian chanchin thar an lo nei leh a. Chu chu Tv Lalhmachhuana bo chungchang kha a ni. December, 2012 velah pawh hna thawk tawh lovin a lo vak raw lai mai mai a ni awm a. A thiante’n an pute hriat lohin a rukin an lo chhawm dawl ni awm tak a ni. Mizoram lama thawn haw tum a nih mek laiin a bo thu puan a ni.

A mak a ni!
Ka hmelhriat pawh a ni loa ka ngaihven lutuk lem lo bawk. Mahse rin aiin Bangalore Mizo khan Tv Lalhmachhuana bo zawn chungchangah khan an lo lungrual hle mai tih ka hmu a. Rim takin, mizo takin an lo zawng a ni. India khawpui-a mihring tam zia ngaihtuahin beiseina nena khatia Bangalore mizote an thawk chhuak kha mak ka ti khawp mai a. Chu chauh chu a la ni lo – tu’n lo haw lo se: Tv Lalhmachhuana hi hna pawh thawk thei lo khawpa mi ang zan lo a ni. Mi pawimawh tak a ni hauh lo tihna a nih chu. Heti khawpa an ngaihven hi mizo rilru chhuak atanga hmangaihna lo awm vang niin ka lo hmu a. Chu chuan Bangalore Mizote hmel a timawi hle a ni!

Beng ka chhi ve reng a
Chanchin hriat tumin beng ka chhi ve reng a. Thuthar ka hriat chu -  Uligehalli village , Nelamangala Taluk, Bangalore  atanga km 28a hla chu ni 22/2 khan a chhuahsan tih te, 23^rd Feb khan BMA  chuan a tuk holiday a nih avangin zawn hnatlang a rawt leh tih te. Two wheeler neite chu thahnemngai turin an ti nasa hle bawk niin ka hria. Mahse hemi tum pawh hian an zawng hmu chuang lo a. A reh leh ta vang vang a. Larinpuii inti hian BMA website lamah March ni 1 khan ngawrh taka rei tak an zawn thu leh a chanchin engmah an hriat belh loh thu a lo ziak a. Pawi ka tih rualin Bangalore Mizote inpekna fakawm ka ti a ni! FIR thehluh te, Newspaper lama a thlalak an chhuah te leh pamphlets singkhat chuang an sem te kha hna chuang bang diktak a ni si a.

Hmuh a ni ta!
March ni 9 zan reh tawh takah Face book lama group pakhatah hian Tv Lalhmachhuana hmuh a nih thu ka hmu hlauh mai. Ngun takin ka chhiar tha leh a. KLE ( hei hi a lam pum tun thlengin ka la hre lo tlat) lama zirlai pahnihin Train Station lamah an lo hmu a lo ni a. Chutah chuan KLE lama mizo zirlai zawng zawngte inkoh khawmin mipa canteen lamah ei turte an pe a, thawmhnawte pawh an pe a ni. A thlalak pawh an lo dah a. A hmel en khan khan mi tangkai tak – uihawm em em, Bangalore mizo tamtakin hna pawh thawk tha hman lek loa zawn vak vak a ngai a nih hmel loh. ‘Duh leh lo bo ve mai mai rawh se’ tia mahni hna emaw buaipui san daih chi niin ka hmu a, kawng lehlam taka thlir chuan. Mahse chutiang chuan an ti hauh lo!

Thil tha a thlen hian Isua leh a kaihnawih hriatchhuah a lo awl thin!
Isua Krista’n Samari mi tha tehkhin thu a sawi pawh kha min tihrechhuak chiang khawp mai a! Juda puite chauh an vengte an nih loh zia leh an uanute leh hnampuite chauh hmangaih tur an nih loh zia (concept) kha a  rawn hlui leh a ni. Mizo rilru thianghlim – mi dangte khawngaih theihna leh hmangaih theihna, mi dangte tana inhman duhna lo lang kha vai rama awm tan chuan a va ngaihnawm leh zual em! Mahse heng zawng zawng hi inlungrualna tello chuan thil tih harsa tak a ni zel a ni.

March ni 12 a lo nih meuh chuan Tv Lalhmaa chuan Aizawl a thleng tih an lo report ta. A lawmawm ka ti khawp mai. Tha leh zung sengtu zawng zawngte a let tam takin Pathianin a malsawm ka ring tlat a ni. Kha thil thlengah khan Bangalore Mizote a tihmingtha a. Tin, Mizoram pawna mizo awm zawng zawngte min chawimawi a ni.

Thupui ber - inlungrualna
Helaia pawimawh ka tih deuh mai chu – Bangalore Mizote tlawmngaihna leh inlungrualna hi a ni. Tun kum zabi liam taa Philosophy zirchhuah pui ber chu – ‘Unity in diversity’ tih hi a ni mauh mai! Saptawnga dah hi he laia ka blog lut pha chin chuan kan hriatthiam vek ka ring a. Thil hlawhtlinna hi han chhui chiang ila thil inang lo taktakte lungrual taka lo thawhho vang a ni tlat thin. Chhungkaw hlawhtlinna pawh inang lo taktakte lungrual vang, Kohhran lo hlawhtlin chhan pawh inang lo taktakte lo inlungrual vang, khawtlang lo hlawhtlin chhan pawh inang lo taktakte inlung rual vang, chutiang zelin eng hlawhtlinna pawh – ho deuh anga kan ngaih thleng hian a hlawhtlinna chu inang lote thawhhona tha neih vang a ni zel mai. A pawimawh ber chu inang lo taktakte inlungrual vang a ni zel tihna a nih chu. Pawl  – YMA, KTP, TKP, PYD, SAY, ldt., hlawhtlina pawh hi inang lo taktakte lungrual taka hna an thawh theih vang a ni. Kan taksa pang hrang hrang pawh hi han chhui thla ila, duh chuan atom chhung thleng pawhin! A hlawhtlinna thlen tu chu inang miah lo te’n lungrual taka hna an thawh theih vang a ni asin. I duh chuan kan culture pawh hi ngun zawkin han zirchiang teh… Inang lo lutukte lungrual taka hna thawh avang hian midang tana ngaihthlak nawm – hlawhtlinna a lo thleng thin a lo ni.