Zu Chungchanga Revd Chuauthuama Thuziak Kha (15th March, 2014)

Tukin Vanglaini-a Pu Rev Chuauthuama ziak: ‘Roreltute thu awih chungchang’ tih chu ka helh deuh khawp mai. Amah, Pu Chuauthuama hi kei aia Bible zir rei zawk leh thiam zawk chu a ni na mauh mai. Amaherawhchu keuh thluk tumna lam a nei sa lutuk a, duhthu a sam lo ka ti deuh.

A ziak danah chuan a hunlai – context thlirin roreltu thuawih tih chu kristiante kha bawih an tam avangin an pute thu awih tura a tihna niin a thlur bing a. Kristian tirte kha Isua Krista thihna leh thawhlehna avangin sual bawih ata chhanchhuah ni mah sela mihring bawih nihna lak ata erawh chhanchhuah mai an nih loh avangin an dinhmun chu pawm thiamam roreltu (pute) thu awih turin Paula khan a chah niin a ziak a. Chu chu Philemona bawih tlan bo Onesima hmangte khan a lo nemnghet a.

A ziah zelnaah chuan roreltu thuawih piah lamah roreltu pawh paithla theitu kan ni ti hialin a ziak bawk a. Hei hi a ni thei chiah em aw...

Pu Tirhkoh Paula’n Roreltu a tih hian a hunlaia Rom lal ber leh bial hrang hranga roreltute a kawh tumna niin a lang. Tin, Rom sorkar ruat ni lo roreltu dang judate rorelnaah Sanhedrin pawh kha a hmer tel maithei bawk e. Chungho chu Paula khan dodal loh tur a ti ni mai zawkin a lang. Judate kha Pathian dang lo chu lal dang nei lo inti tlat an ni a. Chhiah pek chungchangah pawh khan Rom sorkar hnenah khan pek an duh lo thin nasa a ni. Zeolot pawlho phei chuan Palestina ramah, a bik takin Galili ramah khan buaina an siam deuh reng a ni. An kawlhsen em em a ni... Chutiang kara kristian hmasate chu roreltu thu awih hram hram turin a hrilh ni berin a lang.

Amah, Pu Tirhkoh Paula ngei pawh kha vawi tam tak nasa taka sawisak a ni a. Thi lek leka vuakte leh tlang chil thlengin sawisak a ni. Amah sawisatute leh diklo taka titute kha roreltute vek an ni. Philipi tan ina amah leh Sila khungtu kha roreltu chi khat – city magistrate an tih ang kha a ni a, tin amah tiduhdahtu thinte kha tualchhung roreltu an ni ber zawk a. Chutiang zawng zawng kara roreltu – ringtu pawh ni lo a thlir dan kha a ropui em em zawk a ni. Ani chuan anmahni thuawih a, hreawm tuar kha a thlang a ni. Thil nep lutuk – insumtheihlohna avanga sualna lo siamtu zu avanga hreawm tuar nen chuan inang lo ve tak a ni!

Zu thlah zalen tumna kan roreltute atanga lo chhuak hi Pu Tirhkoh Paula’n roreltute laka harsatna a tawh emaw kristian hmasa te’n hruaitu ringlotute laka nekchepna an tawhte nen chuan a inang lo khawp mai. Isua thihna leh thawhlehna avangin roreltute thu chu hreawm tuarna a ni emaw engpawhnise an thunuaia kun zel turin a fuih ni berin alang. Tin, rom roreltute kha an diklo a nih chuan amah ngei khan anmahni dan vekin a cho let ngam zawk a ni. An rorelnaa va inrawlh emaw lam chu a lang lo tlat.

Zu avang hian kohhran hian tihduhdahna kan tuar dawn miah lova. Mahse kan hlauh ber erawh chu Zuin a ken tel sual hi niin alang. Pu Tihrkoh Paula hunlaia a lehkhathawn (context) nena khaikhin chuan a inpersan viauin ka hria. Nge Mizo kristiante hi zu hlau tawk lekin Isua Krista hnungzuitu kan ni em tih hi inzawhfiah a hun tawh khawp mai! Nge chhung lamah sum ngainat avanga sualna lian tak kohhran mite’n kan hmachhawn mek hi hmai hup nan zu hi kan do zel dawn zawk?
Pu Tirhkoh Pauala leh kristian hmasate khan roreltute kha an va kawm ve em em pawh ka hre loa. Tin, Rom sorkar kal zel dan turah thurawn emaw fuihna lam emaw an sawi thu pawh ka hre chuang lo. An dan kha diklo deuh mah se kristian rinna principle hmangin an tuar hram hram a. Mi tamtak phei chu an MARTAR hial a ni!

Mizorama kan kohhrante hian ram rorelnaah an inhnamhnawih duh tak tak a nih chuan SUM avanga kan harsatna hi ngaipawimawh zawk sela a tha zawk ang mawle. Amah Pu Tihrkoh Paula ngei pawh khan a thih dawn tepa kohhran inrelbawl dan leh kohhran enkawltute awmdan tur a nau Tv Timothea hnenah lehkha a thawn a. A lehkhathawnnaah khan chiang takin sual tireng bul chu – SUM a ni tiin a ziak kuau mai si a. Mahse heti chung hian kohhranah leh ringtu punkhawmnaah zu inmite chu kan hnawl a, Eirutute erawh chu kan la lawm em em lawi si a! Bible hian zu ruih hi a sawi mawi miah lova, chutih rual chuan sum diklo taka hman phei chu a dodal bur thung a ni. Eiru dodal nana LOK AYUKTA BILL an siamte hi diktaka hman a nih theih nan zoram kohhrante hi han tawngtai luai luai mai ila a va tha dawn em! Hei lo liama roreltute thuawihna hi a awm thei dawn si loa...

Khawbel Khuaa Thilthleng Kha...

Tunhnaiah Khawbel khuaa thilthleng whatsapp leh fb velah a darh nual a. Kei pawhin ka dawng ta malh malh mai a(atam zawk chuan hrilhfian turin min ngen a). Mizote hi tunhma atanga zeldin thubawl leh tapchhak titi ching kan nih avang hian thil ni thei miah lo hi sawi kan la ching viau mai a. Heti ang chi hi society atanga nuaibotu nih ve hi kan tangkaina pakhat ve niin ka inngai a. tin, keimahni lam kaihnawihte a nih avangin hrilhfiah ka lo tum ang e.

Thil pahnih engpawh hi an inhip vek a chu chu Newton's law of universal gravitation an ti a. Chu hipna chu a inhipate a len poh leh a na a ni (force a tam tihna). Kawlbem khuaa nufa ft 30 a sanga zuang thlate pawh kha khawvel (earth) nena inhipna vang a ni a. A nu zawk kha a let 5 velin lo rit zawk ta se, lei nena a inhipna chu a let 5in a fapa aiin a chak zawk dawn tihna a ni. Hemi thleng hi Physics background nei lo chuan kan suangtuah thiam niin a lang a. Hemi avang hian anu zawk kha thleng hmasa viau zawk turah kan ngai niin a pawm theih a.

Amaherawhchu, khialaia inhipa force piah lamah khian thildang (parameter dang) lo lang leh a awm a. Chu chu acceleration a ni a. Acceleration chu second khat (hun/time) chhunga a kal chak zawng tiin dah tawp ila kan hrethiam ang chu maw... Chuan thil pahnih an inhip hian khilaia acceleration kan tih a ritah a tlem zawk zel a. A saptawng chuan inversely proportional to mass (a=F/m) a ni. Chumi awmzia chu kan sawi hmasak conditionah khan rihna ngah zawk khan force nei tam mah se acceleration a neih tlem zawk avangin a kal chak bik dawn lo tihna a lo nih chu...

Tin, engpawh hi lei chung atang kan thlak hian a kal chak zawng hi thil rih zawngah a innghat miah lo a. Hei pawh hi universal law awmsa - conservation of energy law hmangin awlsamtein a finfiah theih a. Entirnan a nu zawk rih zawng kha 'm' ni ta se, chuan a zuanna san zawng kha 'h' ni bawk ta se, Energy (potential) a neih zat chu:
 
PE=mgh (g=lei hipa avanga acceleration lo awm)

A zuan thlak chiah khan khi laia a chakna neih zawng zawng khi Kinetic energy-ah a inthlak anga, heti angin:
KE=1/2mv^2

Mahse KE leh PE hi an inang a chuvangin heti ang hi kan nei leh ang a:
v=sqr2gh tiin.

Chumi awmzi chu thil engpawh hi an tlak thlak chuan an kal chak zawng hi an rihnaah an innghat lo tihna a ni. Chumi awmzia chu Pi Lalnunhlimi leh a fapa chu a rual chiaha an zuan pawhin thleng hmasa zawk awm loin an thleng rual dawn tihna a lo ni a. Anu zawk hi a zuan hnuhnun zawk phei chuan a thleng tlai zawk dawn tihna a ni.

Khilaia ka hrilhfiahna khi free falling behchhan a la ni cheu a. Free falling kan tih chu boruak avanga lo nekkawitu leh dangtu awmlo anga kan ngaih hi a ni. Boruak avanga nekkawina emaw dangtu emaw kan la ngaihtuah tel chuan ball - pianhmang inang chiah chiah pawh hi a lian zawk leh rit zawk chu thleng har zawk tura chhut a ni a. Chuvangin a rualin zuang pawh nise anu zawk khi a thleng tlai hret dawn a lo ni.

Khawbel khuaa thilthleng hi information peksual avang a nih loh pawhin sawi uar hret an awm a ni ang.

Ni Tih Din CHungchanga Revd Chuauthuama Ngaihdan Kha...

Pu Chuauthuama hian eng rilru nge a put tih hi ka ngaihtuah nasa thin khawp mai! Seminary leh theological college vela sawi tur awm ang chi hi layman-ho zingah hian sawi leh mai zel a…a rawngbawl tum dan chiah hi hriatthiam a har a. Amah hi Liberal Arts background nei a nih avangin a thuziak tam tak hi fact and figure lam ni lo – tapchhak titi leh zeldin thubawl ang ni tep tep – a thlirtu azira danglam thei thil hi a sawi fo thin!

Bible zirmite hi thuang hnihin an then theih a. Kan hriatlar zawk chu Lower criticism zirtirtu an ni a. Anni hian Bible thu hi a textual context (tawngbul, thumal leh manuscript) ang zawngin an zir tlangpui a. Mahse higher criticism kan tih ho chuan a hun laia history te, a ziaktu te leh science tarmitte vuahin an zir tlangpui thin a. Tin, miracle an tih ang hi an ring lo tlangpui bawk a. Khawvel thiamna hmanga hrilhfiah hi an tum thin… Hen’g zirna lo tanna pawh hi Germany sorkarin kum zabi 19naa an rama Pathian thu zirna an lak vek tuma Pathiana piantharna nei lo te’n Bible an lipse hnu khan a ni.

Pu Chuauthuama pawh hi higher criticism huang chhungah hian a in IDENTIFY ve niin ka hria a. Platform remchang a neihna apiangah hian a lo ti chiam thin… A Beirual leh Nilai Thupui bu pawh hal sak a ni hial tawh a, heti ang thil avang hian… Mizote zinga rawng a bawl tum ve dan hrim hrim nge ka hre law! Amaherawhchu, layman zinga heti ang higher criticism tarmit vuah chunga thil sawifiah tumtu chuan confusion – Thlarau lama buaina a thlen a ni tih hi chu a hriat ve ka ring. A nihna takah chuan ani aia inla higher criticism tur hi an tam tawh mai a, mizo theologian zingah hian. Thuthlung Hlui leh Hebrew tih velah pawh ani aia thiam leh degree nei sang pawh hi an awm. Mahse anni chuan Bible zirmite zingah leh mi intellectual zingah chauh sawi chi a ni tih an hria a, an ngawi niin ka hria!

Intellectual Circle-ah hian thilthleng emaw enge maw issue lian deuh a awmin miin a chhan, a thawh dan leh a pawimawhna an ngaipawimawh em em thin a. Chu chu a saptawngtin SIGNIFICANE, IMPACT leh PROPAGATION tiin an dah thin a. A chunga ka sawi ang khian society leh eng system pawh nghawng thei thil a awm chuan miin a chunga kan sawi tak point 3te tarmit vuahin ngun lutuk an thlir thin a ni.

 Entirnan: July, 2013 khan Bazar Veng, Lunglei YMA chuan German Ral Lian tih hla chu Mizo rilru mil turin dangdai takin Music video an siam a. Mahse mak tak maiin Social Networking Site lamah leh titi lengvelah sawisel a hlawh nasa hle mai a! Chuta an sawisel ber chu – Mizo thalai German ral do tura kalte kha Silai kenga ral do ve tak tak tura chhawr an ni lo a. Mithi ruang hlawmtu anga chhawr an ni ber a. Mahse music vedio – ah khan Sipai pangngai anga Silaite kapa raldo angin an lo tilang ta daih mai si a. Chu chuan History thiamte leh a chinchang hre chinte mit a tikham hle a ni. Mahse ngun taka kan ngaihtuah chuan tunthleng hian Mizo mipuite hian kan Mizo pasalthate kha khawthlang ramah zu kalin Silai nen nasa taka ral bei angin kan ngai tlat a. Chumi chuan rilru tha leh ngaihtuahna thar min siam sak a, chumi avang chuan Music video lama silaia hmanga raldo anga an lantir pawh kha a awmzia em em a ni. Mizo society lama a IMPACT, SIGNIFICANCE leh PROPAGATION kha kan thlir pui lo thei lo a ni.

Chuti ang bawkin Krismas kan hman thin pawh hi Isua Krista pianni tak a ni hauh lo a amaherawhchu Pathianin min tlanna turin a fapa a lo hlanna anga ngaia Pathian hnena lawmthu sawi nan leh fak nana kan hmang zawk hi a nihna tak phawk chhuaktu a ni a.

Bible thu pawh hi mithiamte ngaihdan lo deuhin miin lo hrethiam mah se Pathian leh a inkar that nana a hmang a nih chuan a tawk tiu teu khawp mai! Hei hi theologian-ho thiltum ber pawh a niin a lang. Chuti ni lova intihhriat lutuk avanga thil tam tak sawi chiam chiam hian mi Thlarau nun a chawm ber lovang!

Zikpuii Pa leh Pu Saiawia Thlavang Hauhna

Zofate zinga ka mi ngaihsan Pu Lalhmingliana Saiawi khan lehkhabu a ziak nual a. Chhiar hlawh tak tak an ni hlawm a. Amaherawhchu, ‘Book of the year’ chawimawina a dawng miah lo! A dawn loh chhan nia an sawi thin chu a lehkhabuah zahmawh rawngkai a tam an ti a ni. Amah ngei pawhin ‘book of the year dawn chakna ka nei lo e’ a ti hial reng a.

Tin, mizo novel awm tawh zawng zawnga tha ber leh ngaihnawm ber tura ngaih – Zikpuii Pa kutchhuak Nunna kawngthuampuiah tih pawh khan MAL Book of the year chawimawina a dawng bik chuang lo a. A chhan an sawi pawh zahmawh lam hawi a tam em mai tih a ni. 

Pu Lalhmingliana Saiawi hi Mumbaia ka awm hnu hian ka hrechiang leh zual a. A Pathian thu zia leh a kohhran mi zia te, a hnaa a rinawmzia leh a eiruk loh zia: Pathian thu awih a nih zia hi sawi sen pawh a ni lo. A lehkhabua zahmawh rawngkai awm lo tih ngawt kha a ni hauh lo!

Zikpuii Pa pawh chuti tho. Nunna kawngthuampuiah tih hmang khan a Pathian thu awih dan leh pawm dan ril lutuk – Pathian hmangaihna, khawngaihna leh zahngaihna – GRACE changtu a nihzia a lang thei a ni…

Literature hi zau taka ka hrilhfiah ve dan leh ka hriatthiam dan chu – hringnun pholanna tih hi a ni a, ka pawm dan pawh a ni. Hringnun hi zahmawh telloin a kim lo a ni tih chu mi puitling/intellectual chin chuan kan hrethiam vek ang… Amaherawhchu, pawn lam chauh lan mawi duhna Kristian ramah hian Pu Lahmingliana leh Zikpuii Pate chuan hmun an chang lo a nih kha maw!

Literature lama kan mithiam pui puite pawhin pawn lam lan mawi duhna avangin literature nihna bo thakin thil an teh tihna a ni a...Hei hian mizo society anga kan nihna diktak – identity a pho chhuak chiang hle a ni…

Miss Mizoram Bikini Round an tih emaw ni pawh hi I ngawih san mai mai ang u… TV, Internet leh social networking site lamah kan hmuh nasat tho hi maw… Miin eng tin vak mah an ngai lo ang...

PS: Pu Hminga leh Zikpuii Pa thlavang ka hauh chakna a rei tawh bawk a. Remchangah ka lo la pah bawk a ni e...

Ka Hmaah Lui Rak Khawmawi Chu a Awm - Zumi

Thingtlang khawchhuak ka nihna piah lamah hian khawi hmunah pawh hian awm mah ila cultural identity hlauh hmaka ideology leh philosophy han zawm hi ka rilrem zawng a ni ngai miah lo a. Serkawn Sikul-a kan kal lai atang tawh khan thiante khan khawthlang hla - rap music leh eng ilo vel kha an han ngaina thin em em mah se kei chu mizo irawm chhuak hla ngei khan ka thinlai a fan thei zawk a, thinlung lawm leh sawhkeh zawng zawng pawh rilrua ngaihtuahna lam hawi zawngin atakin a ti-nung sar thei zawk zel a ni.

Pathian hla phuahthiam hi mizote hian kan nei ve nual a. Pawimawh ni-a ka hriat ve ta a chu: Pathianin a hmang rei em? Enge a IMPACT (thawhdan), PROPAGATION (a hunlaia miin an dawnsawn dan) leh SIGNIFICANCE (pawimawhna) tihte hian tehkhawng min siam fo thin a.
Zosap zingah pawh Zosapthara khan Pathian hla a siam nasa hle a. Chutih lai chuan Sap Upa leh Zosaphluia khan hla tlemte an nei ve a, mahse an hla tlemte zingah khan 'Isua Krawsa mak tak chungah khan' tih te 'Kan Pathianin min hruai zel thin' tih te hi hla chuai thei lo mizo kristiante nun chawmtu an ni a ni.

Mizo hlaphuahthiam hmasaah te pawh khan hla tam tak phuah an awm a. Thenkhatte chu lar pawh an lar a, nitin zantina kan sak thinte pawh an ni hlawm. Chutih rual chuan hla pakhat chauh phuah nia lang Pu Chawngkhupa te leh Pi Zumi te pawh hian kan thinlung leh ngaihtuahna te, kan thlaphanna leh lunglenna, nunkawng buaina avanga kan indawmkunnate hi Kalvari Tlang Kraws bulah min hnutchhiah sak chat chat thei a ni.

Ka hmaah luiral khawpui mawi chu a awm tih hi kan tet lai atangin ka hre lar hle a. A hnuah zirlaibuah a tel ve avangin kan zir leh a. Thil chinchang hriat tawh hnu - critical leh analytical thinking hmanga thil articulate tum lai vela zir kan nih avangin he hla hi ka thinlungah hian a cham rei khawp mai. Zumi hla neih chhun hi mizo irawm chhuak hla hmasaberte zing ami niin a lang a.
Pu R Lalrawna ziak Mizo Rohlu tih lehkhabu lama a lan dan chuan Zumi hi a nulat lai atanga hrisel lo em em - pasal then, tin a fa pai tak pawh dam rei lo. Apa a boral avangin a pa unaupa a bel a; kei aia naupang, kum 30 mi chauh niin a vanram kawng zawhna Kalvari Kraws Kawng hreawm chu a lo zawh zo ve ta a ni. A hla leh a chanchin han zir chian hian mite anga awlsamtea Kraws kawng zawh -a vanram thlen tum loin he khawvel hreawmna leh tuarna hnuaia a vanram kawng zawh dan hi a turu hle a. Sorkar hna lian officer eiruk awlsam eltiang pawh thawk mah se Pathian avanga channaah ngaiin corruption tih velah pawh a fihlim dawn niin a rinawm a ni.

Muanpuia'n tunhnaiah a lo thar thawh leh hi a ropui ka ti a. He hla hian Kristian nun awmze ril - Kristian vanram kawngzawh tih lehkhabu atir atanga atawp thleng min mitthla chhuah tir thin a ni. A ropui khawp mai!