19 October, 2018

IIT ranking hi a va hniam ve...?


Thu hma

Tum khat chu Mizorama ka hawn hian kum lama upa tawh tak, zirnaah pawh sulhnu nei lem lo hian ‘Engah nge IIT hi zirna tha tehna-ah in va thleng sang thei lo ve?’ tiin min zawt thut mai a. Ka lo ngaihtuah ngai miah loh thil a ni a; han chhan vak ngaihna pawh ka hre lo. Nikuma Quacquarelli Symonds (QS) in khawvel pum huapa ranking result a tihchhuahah khan IIT (Indian Institute of Technology) ho hi top 100-ah an lang pha lo leh a. Ka ngaihtuah chhun zawm ta zel a.  US-ah khuan college an luh dawnin entrance pakhat SAT (Scholastic Assessment Test) an tih hi an pe ve thin a. Chu nena khai khin chuan IIT lama undergraduate entrance JEE (Junior Engineering Entrance) hi a har zawk daih mai si a. Tin, campus chhunga hnalak (placement) lamah nise khawvela company lian Google, Facebook, IBM, Samsung, ldt., hian IIT atanga graduate chu an la reng tho bawk si. Tin, IIT atanga zirchhuakte hi Academics, Industry, Corporate company, ldt., lamah mi chhuanawm tak tak an tam bawk si avang hian ranking hi ngaihven a hlawh viau niin a lang a ni. 

Ranking engtin nge an lo siam thin?

Tun kum khan National Institute Ranking Framework (NIRF), MHRD chuan a vawi khatna atan result an lo tihchhuak a. Engineering college tha thlan chhuahah khan kum 2008 a din IIT Patna chu 10na niin a din tirh atanga lo mentor-tu (enawkltu) IIT Guwahati (kum 1994 a din) chu 11na a ni zawk daih mai a. IIT pahnihnte ataka hrechiang tute chuan mak an ti hle a ni. Engpawhnise, khawvel pum huapa University ranking siamtu lar Quacquarelli Symonds (QS) hian eng tin nge an lo teh thin han thlir thuak teh ang:

·        Student Faculty Ratio: Hei hian tehna pumpui atanga chhutin 20% mark a pu a. Tehfung awlsam bawk si leh sawi buai vak thei lo niin a lang a. Amaherawhchu, institution thenkhat chuan Faculty an hrilhfiah dan hi a lo danglam khawp mai. Professor bakah Research Faculty leh Post-doctoral ho zawng zawng hi faculty angin an lo chhiar tlat mai a. Entirnan nikuma 12na ni thei National University of Singapore chuan a chunga kan sawi ang chiah khian faculty zat an lo chhiar tlat mai a. Tin, MIT, Harvard, ldt., ah pawh hian Professor an tih bakah hian Lecturers an tihte pawh hi faculty angin an lo dah tlat mai bawk a. Mak deuh mai chu Europe-a zirna tha ETH Zurich-ah pawh hian kum 2011 khan professor nghet (full time professor) chu mi 428 chauh awm angin an tarlang a. Chuti ang a nih dawn chuan ranking siamtu agency te’n student faculty ratio tehkhawng an hrilhfiah dan leh pawm dan hi a lo chiang lutuk lo tihna niin a lang. India ramah chuan professor chauh faculty angin kan chhiar si a… 

·        Citation per Faculty: Research community-ah hian midangin an lo tih tawh sa (hmuhchhuah) an lo hman tangkai hian an paper ziahah an tarlang thin a chu chu citation an ti thin a. Hei hian 20% tho a pu. QS Agency hian citation chungchanga database siamtu Scopus hi a lo ring tawp thin a.  IIT Bombay-ah hian paper publish tur an thehluh dawnin IIT Bombay, I.I.T Bombay, IITB, IIT Powai, ldt., tiin an lo ziak ringawt thin bawk a. Rank siamtu agency chuan pakhat chauh a ring si a, a buaithlak ta thin a ni. 

·        International Students: Ram dang zrilai awm zat hian 5% lai a pu ve a. Hei hi ram thang mek (developing country) tan chuan tih ngaihna a vang khawp mai! Mi hausa te’n ram tihhmasawn nan tax an pek zar zova din leh enkawl a ni a. Chutih laia developed country atanga zirlai chawk luh chu thil tih chi a ni lo. Exchange students programme hi a awm a, amaherawhchu IIT-a exam hi har an tih lutuk thin avangin an lo kal tha duh lo a. A lo kalate pawh hi international students angah min chhiar sak bawk si lo. India sangawi zawn pui ram rethei deuh atanga lo kal tlemte hi an point hmuh ve na a ni deuh mai…

·        International faculty:  Hei pawh hian a chunga ami mark zat chiah a pu. IIT zawng zawng hian hetah hian mark an hmu ngai lem lo. Chhan tam tak a awm thei a. Langsar ber chu: India hian zirna leh research lama mi tha rawih sen loh a nei a. Midang lo rawih buai vel hi a harsa em em a ni. 

·        Employment reputation: Hei hian 10% a pu ve leh thung a. Amaherawhchu engti angin nge data an lak a an teh (quantify) tih hi tunthlengin hriattheih a ni lo. MIT, Harvard, Cambridge tih velte hi IIT hian a tluk miah lo a amaherawhchu university dang tam tak tluk thei a ni tih chu hriat sa a ni a. Entirnan: Google, Facbook, GE, IBM, ldt., ah hian IIT atanga BTech zir chhuak an rawih duh bik zia pawh hi a lo awmzia lutuk lo a ni mai thei. Tin, campus placement pawh hian kori a tu lo hle tihna niin a lang a ni. Pawi deuh mai chu IIT hian website lamah hian an tarlang ta thin lo a, anni tan pawh hriat a lo har deuh pawh a ni mahna…

·        Academic Reputation: Hei hian 40% lai a pu a, a pawimawh fal bik hle a ni. Amaherawhchu vanduai thlak takin ranking siamtu agency hian engtin nge data an lak a, engti ang takin nge an teh tih a hriat theih miah loh a ni. US lama university tha a Master zirna admission hmu tam berte hi IIT atanga a nih zia te ai chuan research funding zat leh a behbawm vel hi an awn zawk emaw ni aw tih mai a awl khawp mai. 


IIT hian tihsual an nei em? 

Pawi deuh mai chu – IIT zawng zawng deuh thaw hian kal dan (style) an nei ve a. Han inzuar (advertise) emaw ang chi hi an tih loh lam tak a nih avangin website-ah hian thil hriat ngai tam tak an dah ngai lo. Tuaithar (update) lo hian website-te hi a awm pheng phung hlawm a. Entrinan: Phd zirlai zat te, funding an hmuh zat te, research patent zat te, ldt., hi website-ah hian an nem kai ve ngai si lo a. Ranking tehna tur data an dil ngai bawk si lo; anni hian website lama an hmuh theih chin chauh kha teh nan an lo hmang tawh thin si a. Tunah hian ranking hi a pawimawh ve tho avangin tan I la ve ang u tiin IIT Bombay Council Meeting phei chuan thutluknate pawh an siam ve ta a ni.

Ti tawp ang…

A thui dawn ta viau mai.  Mahse chiang taka ka sawi duh chu IIT hi zirna leh research tihna hmun tha pangngai tak a ni a. Zir duhte tan zirna tlak a ni. Chutih lai chuan Mizoram NIT (National Institute of Technology) pawh hi Institute of National importance huangchhunga awm a ni a. Amaherawhchu state dang NIT nena khaikhinin a thang muang hle mai… Chhan tam tak a awm thei anga; a ngaihventu kan nih a hun takzetin ka hria. Mizoram University erawh a central Univeristy puite, amah aia upa zawkte pawh leh pelin NIRF raking siamah 51-na a ni pha a; a lawm awm em em a ni!

3 comments:

  1. Ka ngaisang hle mai che 👍

    ReplyDelete
  2. Indian institute of technology ho hniamna pakhat chu innovation leh creativity ah a ni. Khawvel journal tha leh rintlak , khawvel dengdawt khawp research engtik nge IIT in a neih hnuhnun ber le? Originality neih lamah hma chu an sawn chak na meuh mai mahse Western countries a engineering colleges leh universities ho el pha tur chuan Research quality lamah tan viau angai ang.Kum 20 vel tal ala duh ang le .
    Problem pakhat lian tak chu Elementary level atang Byheart a kal chho matriculation pawh theory byheart a distinction a pass atam zawk kan ni a.Higher education a reaserch quality beisei san vak ngaihna awmlo. Engineer kumtin 1.5 million graduate ziah na ram Bsc ringawt pawh nuai 10 chuang chhuah ziahna ..phd pawh singkhat chuang kumtin conferred na ram ah hian eng thil ropui (reasearch) nge chhuak thin le! Research methodology leh principle awmsa , Mi literature sut keu hmanga thesis siamna ram a nie India chu

    ReplyDelete